Ynne ka sngi ka seiñ Meghalaya People United Front (MPUF) wa ka Jaiñtia Students Movement (JSM) Shangpung Unit, hapoh i yahkhmat u Phrang Suiam, u Byntami Sajem wa ki dkhot yong ki ar seiñ da lai hiar pait ki da idæ ya i thaw wa mut wow chna yaka Coke Factory wa em ha ka chnong Mynkrem Shangpung.
Ha ini i lai pait ki ar seiñ da emlang kiwa chong chnong wei da chem wa ini i thmu wow chna ya ka Coke Factory ha itai i thaw toh iwa booh yei maa ya kiwa chong chnong Mynkrem neibhah wa boon hi ki paidbah toh kiwa rep wa riang, wa lai tong um dih, wa sait-that marjan wa ini i thaw chna ya ka karkhana.
Kiwa chong chnong da ong ki wa ini i thmu wow chna Coke Factory toh iwa da yang dei maa chwa ya kiwa chong chnong wei iwa leh bor da u tre karkhana uwa man leh u waheh chnong ka Mynkrem, wei chi chna da ktah chwa ko ya i rep i riang, ki thaw sait-that wa ki thaw tong um.
Neiliang ki ar seiñ da ong ki wa daw chong pyrkhat yow chim yaka luti wow lai chakhmat.