U Lat ka jylla Meghalaya, u Phagu Chauhan, ynne da lai hiar u cha Dawki, West Jaiñtia Hills kam chibynta wow lai pait ya ka yung krehkaam ka Land Port Authority of India (LPAI) waka Integrated Check Post (ICP), Dawki kawa dang dep wai ini wa dep wei da yachem u leh wa ki heh ki chnat ka sorkar pyrdi kam ka Land Port Authority of India (LPAI), BSF, Customs, ki bor ka District wa kynthup ya u Superintendent of Police, ki SDO (Civil) ka Amlarem wa Pynursla Civil Sub Division deilang wa ki waheh chnong ki chnong wa em chajan.
Ha ka yalang wa da pynman, da pynyoo ya u Lat yei rukom krehkaam ka Integrated Check Post ha Dawki, i kaamram ki Custom wa Central Excise Department wa i pynkrehkaam ya ki Scheme ka sorkar pyrdi wa kynthup ya ka PMAY, MGNREGS, SSA, PM-POSHAN, National Health Mission, PMGSY wa kiwi de da kiwa boon ki chnat sorkar. Neiliang u Superintendent of Police ka West Jaintia Hills da khana u chaphang ki kaam wa yatoh waka aiñ.
Hei yaklam u Lat wa ki waheh chnong da kylli u yei chem chitom ki wa ya ki kaam pynroi wa da pynkreh ha ki chnong yong ki heiwa ki da pyntip ki wa duna bha ka Mobile Network khamtam ha ki thaaiñ khappood wei da kyrpaad ki leh wow chna pyndep smat ya u sarok Shillong-Dawki. Kamtæ u Lat da yaklam u heiyatoh wa ki kaam pynroi ha ka thaaiñ Dawki wei da phah u ya ki heh sorkar wow pait yei bha i miat yong waroh.
Kam chibynta wow pynkhlan yei yatoh lok waka ri Bangladesh, u Lat da lai u cha ka Indo-Bangladesh Maitri Dwar wa em ha Tamabil Border Check Post wei da yaklam u leh wa ki heh ka Bangladesh Border Guards wei da e u leh cha ki da ki baam wa thiang.
Hadien ini, u Lat da lai u cha ka Border Out Post (BOP) ka 4th Battalion Border Security Force (BSF) ha Dawki heiwa u Pradeep Kumar, IPS, Inspector General BSF HQ Shillong Frontier da khana u chaphang i kreh wa da leh ka BSF ha khappood kani ka thaaiñ.
U Lat da lai hiar u leh cha ka wah Mynngot kawa da paawnaam bha ha ki kaam uiñke suwari hapoh ka jylla.
Puræ leh: Da wai ya ka Land Port wa em ha Dawki
