U Montri Khynnah ka sorkar pyrdi wa pait ya ka chnat Home Affairs, u Nityanand Rai ynnin da wan wai u ya ka Land Port Dawki deiwa emlang leh u Symbood Montri Rangbah ka Meghalaya, u Sniawbhalang Dhar wa u MLA ka thaaiñ, u Lahkmen Rymbui.
Kani ka Land Port daw pynkhlan ko yei khayi pateiñ hapyrdi ka India wa Bangladesh, da ong u Rai hawa e yei klam ha ka yalang wai wa da pynman ha Dawki. Deiwa ong leh kini ki ar ri em ki boon iwa sariem nadooh i por wa nachwa wei ini i krehlang pynyoo ko yei lai chakhmat yow ku u roi.
Da ong u leh wa ini daw pynku ko ya ki kaam uiñke suwari neibynta ka Meghalaya kamjooh leh ya ka ri waroh kawi neibha kani ka Land Port da em ko leh ya ka Godown, Canteen, ka thaw booh tiar ya kiwa uiñke suwari waka Electric Substation najrong kiwi de dei thong wow booh lang ya waroh ki yung krehkaam hapoh kawi donhi ka tnoom yung.
U Rai da yaroh u leh yei miat ka jylla Meghalaya khamtam ka Dawki deiwa ong wa ka Dawki kattu da man ko kawa da biang bha i rukom pynyabi ya ka wei ini daw yarap ko leh wow pynku yei kaam sumaar sukhær kamjooh ka puræ puthi.
Kani ka Land Port daw yarap ko yei chalan mar hapyrdi ki ar ri kamjooh i lai i wan ki bru wei da em ko hei thaw wa heh 23 Acre. Da chna hei dor wa T. 83.38 klur wa kynthup yei bai thaw wa T. 74.38 klur wei ya kani ka Land Port da chna hei dor wa kamwa T. 9 klur.
Da em ko leh ya ka Passenger Terminal Building, Cargo Terminal Building, Warehouse, Toilet Blocks neibynta kiwa yah kari, ka Canteen, Entrance/Exit Gate ya ki bru kamjooh ya ki kari kit mar, ka Electric Sub-Station, ka Rummaging Shed, Pump House, Sewage Treatment Plan waka Underground Water Tank.
Da emlang ha kani ka yalang wa u High Commissioner of India cha Bangladesh, u Pranay Kumar Verma, u Chairman ka Land Port Authority Bangladesh, u Mohd Alamgir, u Chairman LPAI, u Aditya Mishra wa kiwi ki heh sorkar na Meghalaya.
Ha kini ki ar sngi wa em u Montri Khynnah hapoh ka jylla, da lai yachem u leh wa ki chipai ka Meghalaya Frontier BSF wei da yaklam u leh yei eh heiyatoh wa i kær pood kamjooh da ya phyllu ya ki kaam wa man pyrchah aiñ ha khappood.
