U MLA ka Nongpoh, u Mayralborn Syiem da lai pait u ya ka Bindas Syiem kawa da chong chah thngan khlem booh por hakhmat ka thaw pynyieñ kari ha Additional Secretariat, Shillong wei ha ini i lai u MLA da kyntu u ya kani ka manbei wow dam noh yei chah thngan, wei da pyntip u ha ka wa i kaam wow pynbha biang ya u sarok Nongpoh-Umden-Sonapur da lai ko chakhmat.
Kam wow pynkynmoo wa ka Bindas Syeim da chah thngan ko kattu la kamwa 48 kynta ha Shillong, wei neiliang u MLA ha kani ka sngi da phah u leh ya ka chnat i chait i khiah wow phah ya ki Doctor wow pait yei long i man ko wei wow pyndait Drip.
Ha ini i lai pait ya kani ka manbei da u MLA da em leh u MDC, u Balajied Rani kiwa da pynman leh yei duwai ha katai ka thaw chah thngan.
U MLA da khana u wa da kyntu u ya kani ka manbei wow dam noh yei chah thngan, tangwa da ong ko wa daw pyrkhat yeini.
Da khana u leh wa i kaam da lai i neibynta wow pynkreh ya u sarok wei i sahteiñ toh neidaw wa em ka Election, deiwa ong leh wa nadooh wa jop Election u ha u snem 2018 da yaklam ya kani ka phang wei da em leh i pynchna ya u sarok ha u snem 2018-19.
Ya kani ka manbei da wan leh wow e kyrchaan da ki para wa chong chnong ko.
Discussion about this post