Lai pynche Ka Dorbar Ki Waheh Kur Ri Jaiñtia ha Amlarem yei emkaam wow pyntip noh ya ki Kur ka War Jaiñtia

Ka Dorbar Ki Waheh Kur Ri Jaiñtia ha ka 26 tarik uni u bnai da pynman ko ya ka yalang paidbah ha Syiem Jingsuk Community Hall, Amlarem.

Ha kani ka yalang wa da pynlai da u Donstan Khonglah, Vice President ka Dorbar Ki Waheh Kur Ri Jaiñtia, da yoh yei puræ ya ka Report kyllum ya i krehkaam ka dorbar na u G.H. Bareh, General Secretary, Dorbar Ki Waheh Kur Ri Jaiñtia, i klam wai phang na u Khroo L Pariat, President ka Dorbar Ki Waheh Kur Ri Jaiñtia, i klam na u Erwin K Syiem Sutnga, uwa e buit ka Dorbar Ki Waheh Kur Ri Jaiñtia wa kiwi de.

Hadien wa kut ka yalang, u Khroo L Pariat da ong u wa i pynman ki ya kani ka yalang toh yow pynsñiawthooh ya ki Waheh Kur kiwa em cha War Jaiñtia heiyatoh wa i pynbna namo ka Notification wa da yoh na ka JHADC ha kini ki sngi wa dadep heiyatoh wa ki Waheh Kur deilang wa ki Dorbar Kur yow pynpsiah pyrtuid noh ya ki khnang wow tipmit noh ya ki da ka JHADC deiwa chna noh da ka aiñ deiwa pynkupbor noh ya ki hapoh ka Sixth Schedule.

Da ong u leh wa neiliang ka Dorbar Ki Waheh Kur Ri Jaiñtia da booh ki yei kyntu næ i kyrpaad ya waroh ki Dorbar Kur kiwa em hapoh ka Ri Jaiñtia yow pynkhreh noh wut wut yow lai e yei pyrtuid ki kur, kiwa kitkaam wa ki kur kiwa em hapoh ka Dorbar Kur yong ki khnang wa ka JHADC u yoh ko u pynbiang wei wow pynpsiah ya ki kur wa em ki.

Related posts

Daw pynman ya ka General Meeting wa nyngkong ka Kur Sumer Pyllun ha Amlarem

November 23, 2024

Dei kreh yonglang pynkhreh ka Seiñ Raij Raliang ya ka Kopati Puja

November 17, 2024

Da kyntu da kyrpaad u leh ya waroh kiwa chong chnong ka Ri Jaiñtia, Ri khasi, Ri Bhoi wa kiwi de yeiwa emkaam wow pdiang ki wei wow pynskem chooh chooh ki yei kheiñ kur kheiñ jait na ka bei.

Da ong u leh wa ki DC ka West Jaiñtia wa East Jaiñtia hadooh kini ki sngi e ki ya ki Schedule Tribe Certificate khlem da tipmit ya ki kur katkam wa kheiñ ka District Council. Hajrong ini da kyrpaad u ya ki Waheh Kur kiwa em hapoh ka Ri Jaiñtia wow pynsmat ki u e ya ki kur yong ki khnang wa ka yung krehkaam u DC kiwa em ha East wa ha West Jaiñtia u e Schedule Tribe Certificate ki katkam ki kur kiwa em næ kiwa toh ki tre ri hapoh ka Ri Khasi Ri Jaiñtia.

Da ong chooh chooh u wa heiyatoh wa ka chongkha khleh, ki Dorbar Kur wym toh u chah pynbiej ki ha ki mynder kiwa ye u pynsih dur ya ki kur ki kha, ya ka ri wa ya ka jaitbru yong i waroh kawi.

Iwa khaddooh ong u wa i kaamram yong ki Waheh Kur waphær waphær toh u em ki yei kitkhlieh u sneiñ ya ki khon chynrang, ki pyrsa chynrang heiyatoh wa i longbru manbru wei wow burom ya ki kynthai wa ki manbei.