Neidaw wa da ieh beiñ ka sorkar jylla ya ki skur sorkar haka thaaiñ Mawsynram da pynman ya ka KSU South West Khasi Hills District wow lai pait wei heijooh i por wow pynchna ya iwa da jæd da pai hadien wa kiwa chong chnong da khana ki wa ki khynnah da hap ki wow kup satri heipor wa slap lada ki kwah ki u chong class wei duna leh i em ki tiar wa jooh pynemkaam man-ka-sngi kam ki ben, ki Desk, ki Blackboard wa kiwi kiwi.
Kamtæ ka seiñ ha ka 14 tarik uni u bnai da lai e yarap ko da ki tin sap yung, ki Desk, ki Whiteboard wa kiwi kiwi deiwa kynchew dei bor samen yong ki dkhot.
Kini ka skur toh ka Nongshluid Government LP School (kawa da seiñ nadooh u snem 1920) waka Kenshluid Government LP School kiwa man ki skur kiwa em hapoh ka Mawsynram C&RD Block wei man ki ki chnong wa hap u lai kjat hadooh 2-3 kynta neidaw wym pu lait kari.
Kiwa chong chnong da ong ki wa ym jooh em mynnu mynnu leh wa jooh wan pait ya kini ki skur wot hadien 100 snem i chakri kani ka skur wei da e khublei ki ya ki dkhot ka seiñ kiwa da lai kjat dei yong kynta yow rah lang ya kini ki tiar neibynta ka skur.
Hachwa ini, ka seiñ KSU South West Khasi Hills District da lai pait ko la arsien itæ haka 15-02-2022 wa haka 21-02-2022 heiwa da chem wa boon ki kamra toh kiwa da pra wei ki tnoom leh toh kiwa da pai najrong wym em ki tiar ki tar kiwa biang wa toh u pynemkaam man-ka-sngi. Da chem leh wa em ki kamra chet kiwa da pra najrong wym em de chna ka sorkar ya ki paikhana wa kiwi kiwi.
Ka seiñ da pynsñiaw ko yei sñiawsih wa i khyrngiat wa dang ini wadep da pynche hapoh Assembly wa ki skur sorkar toh kiwa biang ha ki thaaiñ palatsor tangwa iyi wa chem ka seiñ toh mar dei khangtleiñ wym em bna ka sorkar wow kyntu yaki skur khamtam haki thaaiñ palatsor.
Neiliang ka seiñ da ong ko wa kini toh ki kattu katni donhi ki nongmuna yei rukom e ka sorkar yei stat i tip ha ki thaaiñ palatsor. Wei daw lai yachem leh wa ki bor wa toh u pait yeini.
