Ka seiñ Meghalaya People United Front MPUF-EJHD, ynnin ka sngi da lai booh ko da i thoh ha kamra krehkaam u MDC wa pait yaka chnat khayi-pateiñ u W.G. Sungoh, heiyatoh wow kynreh yaka Trading License kamjooh ka Labour License ki baar jylla ha East Jaiñtia Hills, khatam hapoh yaw Ladrymbai.
Neiliang ka seiñ lyngba u President u K. Blah, da ong u wa ini i lai e dei thoh u man ko kam i pynkynmoo biang yaka JHADC, neibhah ka seiñ ha u snem wa da lai dadep booh ko yei thoh haka 19-11-20, heiyatoh wa ini i jooh i kaam tangwa neiliang ka District Council ym em leh ko iyi iyi heiyatoh wa ini, kamtæ ka seiñ da lai booh biang ko ya ini i thoh deiwa e por yaka District Council 10 sngi wow leh ya ini i kaam, da ong chooh chooh u wa katwa dang mih ki sngi ki por dang boon ki baar jylla kiwa wan kamai kajih ha kani ka jylla ka yong i khamtam ha yaw Ladrymbai, ka seiñ da yoh yutip ko leh wa boon ki baar jylla kiwa wan khih ha kani ka District toh ki wym em kot em sla, em leh kitu kiwa ym em pynthymme ya ki kot ki sla yong ki.
Neiliang u General Secretary ka seiñ u Kmenlang Siangshai da ong u wa i yoh laad ki baar jylla wow kamai kajih hapoh ka District da pynman ko i dooh nong hadooh kattæ ya kiwa chong chnong yong kani ka District waka jylla hi waroh kawi, kamtæ ka seiñ da kyntu joor ko ya u CEM ka JHADC u T. Shiwat kamjooh ya u EM wa pait yaka chnat khayi-pateiñ wow chimkhia ya kani ka kaam wow kynreh khlem da pynslem yaki Labour License wa kiwi kiwi kiwa emkaam hapoh kani ka District.
Ka seiñ da ong ko leh wa i yaichah yong ka ha kini ki sngi wa dadep toh wa burom ko yei klam u CEM ka JHADC u T. Shiwat deiwa ong u wym hoi u chim yei bor ha kti, kamtæ ka seiñ da suki ko, da ong won ko leh wa lada ym chimkhia ka Council sa kani ka kynti, ka seiñ u kynreh hi ko daka.
