Kam chibynta wow pyndep yei kaam wa sahtieñ yong ka Jaiñtia Fishing & Environmental Protection Association (JFEPA) yow wanrah yei suk kiwa khwe dakha, ki tre hali kiwa da ood neipor cheipor wow pynmait wei wow pynbha yei bynta ka wah Myntdu wa tip kam i Ram Pyrthai, kamtæ ynnin ka sngi ka Association da lai wanrah ko da ka JCB yow sai yaka lieñ yong ka PHE kawa da sah hapoh kani ka thwai la kamwa 39 tylli ki snem.
Kani ka lieñ kawa da ka nar toh kawa nadooh i por wa dang chna yaka Pump House ka PHE kawa taan umkor cha Jowai wei ha u snem 1985 da wan u slap uwa joor uwa da kit wei li noh ka ha Ram Pyrthai wei da neh bait ko ha ini i thaw khlem em wa sai.
Ini i leh ka seiñ toh hadien wa da yoh bor na ka chnat PHE lyngba ka yung krehkaam u Executive Engineer ka PHE Electrical Division wei deiwa kyrpaad ki tre hali neipor cheipor wei kamjooh i lehbha u Kenny George Massar, Site Engineer uwa pynkreh yaka In-site Setu Nala kiwa em ha waroh ki liar kiwa tooid cha ka wah Myntdu katkam wa da phah da ka NGT.
Neiliang u President wa Secretary ka JFEPA da kyrpaad wei da khut ki yei ya krehlang neibynta i bha i miat yong ki doh um doh wah kiwa em haka wah Myntdu yow wanrah yei chngaaiñ ki paidbah kamjooh kiwa chong chnong ka Jowai.
Da kyrpaad leh ya waroh kiwa kreh sarok nadooh ki Contractor wow sñiawbha ki wym hoi u pynhaap khyndaw de ki cha ka wah Myntdu khnang yow im u neh u sah ki doh um doh wah yow man ko i kyrkhu yaka patieñ wow wan.
Discussion about this post