Ka Hynniewtrep Integrated Territorial Organization (HITO), ynne ka sngi da lai toor ko cha ka yung krehkaam Meghalaya State Pollution Control Board (MSPCB) ha Shillong, yow dawa pynman biang da kawi ka Public Hearing heiyatoh wa i thmu yow chna ya ka karkhana ka Meghatop Cement ha Wahiajer, Narpuh, East Jaiñtia Hills District.
Ha ini i lai toor ka HITO, da sakhi yei syrtap ki pulit hakhmat ka khyrdop yong ka MSPCB, heiwa da wan mih leh u Magistrate wa ki heh ka MSPCB, wei hadien wa da yaklam sñiawthooh, da e laad ya ki dkhot ka HITO wow psiah chapoh yow lai yachem wa u Member Secretary, u Dr. G.H. Chyrmang, MFS.
U President ka HITO, u Donbok Dkhar da khana u wa hei yachem wa u Member Secretary da dawa wow pynman biang ya ka Public Hearing yong ka Meghatop Cement Pvt Ltd kawa paan bor yow sdang karkhana pynmih khyndaw-bilat ha ka chnong Wahiajer wei da pyntip u wa ka HITO dawa ko wow pynman ya kani ka pynsñiaw paidbah hapoh chitayaaw.
Da ong u leh wa lada ka MSPCB ym ye ko wow pynman biang ya ka Public Hearing hapoh chitayaaw, ka HITO daw chim ko da kiwi won ki yakhih wei wow lai leh cha ka High Court.
U Donbok da phah u leh ya ka khubor cha kiwa chong chnong yong ka Wahiajer wym toh u tieñ ki wei wym toh u biej ki ya ka spah ka phaw u mynder wa wan pynjæd ya ka Bri U Ynñiawtrep.
Discussion about this post