Ynne ka sngi hapoh i yahkhmat u Asst. Waheh Shnong Namdong ‘B’ u Chanbor War wa ki kattu katni ngut ki dkhot ka Committee Chnong Namdong ‘B’ da lai ki wow paan pynche na u Asst. Executive Engineer Khliehtyrshi Distribution Sub-Division MePDCL hajrong i ku syndet ka bai bordiñ ha katai ka chnong khamtam ya kiwa haap ha ka BPL wa kiwa haap ha ka DLT leh kamjooh.
Ka Committee leh da pynsñiaw ko ya chiboon i eh wa kiwa chong chnong da maad ki hawa yatoh wa ka bai bordiñ.
Neiliang u Asst. Executive Engineer da pyntip u wa i ku i bai bordiñ toh na i daw wa da kheiñlang yaka bai bordiñ wa dang sah heiwa da pyntip u leh wa ye u su ya ini kajiak chisien kam ka Instalment ha iwon iwon i por wa sñiaw biang ki wei da pyntip u leh wa lada em i ku palat pood i bai bordiñ kiwon kiwon ki yung, ye ki wow pait ya u Meter yong ki ha ka yung krehkaam ha Khliehtyrshi.
Ka Committee da pynsñiaw ko wa uwa wan kheiñ bai bordiñ namo u Meter Reader toh u tip u wow khana dei ktien neibhah wa dang boon kiwa ym tip u puræ puthi wei toh u pynyoo u yaki paidbah neidaw wa toh uwa kreh yei kaam paidbah.
Ka Committee da kyntu ko ya ki manyung wa toh u tip ki kammon wow pynemkaam ya i bordiñ yow lait na i ku ka bai bordiñ, ka Committee da e yaroh ko ya u sahep wa da kular u wow ya krehlang waka Dorbar Chnong hawa yatoh waka bordiñ.
