U Montri Rangbah ka jylla, u Conrad Sangma deiwa emlang u Lamphang wa ki Montri sorkar da yachem ki wa u Montri Rangbahdooh ka ri, u Narendra Modi ynne ha New Delhi yow yaklam ya kiwa boon ki phang wa emkaam wow tuklar u.
Kawi na kini ki phang toh yow dawa pynkrehkaam ya ka Inner Line Permit (ILP) hapoh ka jylla Meghalaya heiwa ka dorbar chna aiñ ha u Kmaichonglad (Dec) 2019 da dep chim ko ya ka rai wa emkaam wow pynkrehkaam ya ka ILP hapoh ka jylla.
U Conrad da ong u hakhmat u Modi wa i daw wa emkaam u pynkrehkaam ya ka ILP hapoh Meghalaya toh neidaw wa da pynkrehkaam ya ka Citizenship (Amendment) Act 2019, kawa ym ye wow yada yeiwa emkaam ki jaitbru ri-loom wei hajrong ini leh da phah leh ya ka dorkhat cha ka Ministry of Home Affairs ha u snem 2019 yow dawa pynkrehkaam noh ya ka ILP ha Meghalaya hapoh ka Bengal Eastern Frontier Regulation 1873 tangwa ym em yoh jubab hadooh katni.
Da yaklam leh hajrong ka phang wow tipmit noh ya ka ktien Khasi wa Garo hapoh ka Eight Schedule heiwa hajrong ini da dep wow chim rai da ka yung dorbar chna aiñ ha u Khonchonglad (Nov) 2018 wei hadooh katni leh toh iwa dang sahkut waka sorkar India.
U Conrad da ong u wa ka ktien Khasi wa Garo toh kiwa da biang lut yow yoh yei tipmit hapoh ka Eight Schedule.
Sa kawi ka phang toh yow pynbait noh ya ki thaw wa kajia pood hapyrdi ka Meghalaya wa Assam khamtam ki 6 tylli kiwa dang sah heiwa 6 tylli toh kiwa da ye u pynbait wei da soi soskular leh deiwa emlang u Home Minister, u Amit Shah ha u Wisu (March) 2022.
Wei katni leh da dep thung ya 3 tylli ki Regional Committee yow thooh bniah yei long i man yong kini ki 6 tylli ki thaw wa dang sah u pynbait pood noh wei kini ki Commiittee i kaam ki toh u pynsakhiat ki ya waroh iwa da kam da kiwa chong chnong wei da leh yeini deiwa ya krehlang hapyrdi ki ar jylla.
Discussion about this post