Ka Jaintia Students’ Union (JSU) hei pyrtuid u Bocheru Mi Pohsnem, Education Secretary, u Jersom Shylla, President wa u Wansalan Dame Patwet, Asst. Finance Secretary da yaleh mukotduma ki ha ka NGT Eastern Zone Bench, Kolkata pyrchah ya ka sorkar Meghalaya, ka Meghalaya State Pollution Control Board (MSPCB), ka State Environment Impact Assessment Authority (SEIAA), Meghalaya, ka State Expert Appraisal Committee (SEAC), Meghalaya, ka Ministry of Environment, Forest and Climate Change (MoEF&CC), ka Central Pollution Control Board (CPCB), u DC wa SP ka East Jaiñtia Hills deilang ka Shree Cement Ltd hadien wa dadep ki wow pynlum pynlang ki kot ki sla deilang ki sabut heiyatoh wa iwa jia ha ka Public Hearing ka Shree Cement.
Neiliang ka seiñ da ong ko wa da kut i booh por iwa 10 sngi ya ka sorkar heiwa dadep leh wow phah ki kot ki sla hadooh ki FIR cha kiwa boon ki chnat sorkar wow dawa pyndam ya ka Public Hearing kawa da pynman ha ka 31-07-26 tangwa ym em jia iyi iyi leh.
Ka seiñ da kyrpaad ko ya ka NGT wow pyndam noh ya ka Public Hearing kawa dang dep pynman neidaw wa jia boon kiwa pyrchah ya ka Appendix IV ka EIA Notification, 2006.
Da kyrpaad leh wow pynman da ka Digital Aerial Survey ya ki thaw wa mut u tih moochuni yow yada ya ka wah Litein, ki krem wa em ha Shnongrim, u pynbna leh ya ka Shnongrim-Nonkhlieh Karst Ridge kam ka Eco-Sensitive Zone wa kiwi de ki mat.
Ka seiñ da phah ko leh ki Video cha ka NGT wa pynyoo yeiwa jia heipor wa pynman ya ka Public Hearing hadooh i chah tih u sarok, i chah tympiah leh ka Ambulance ka seiñ hadooh wa mynsoo uwa yah.
Ka seiñ da ong ko wa daw lai choh leh ya ka dwar ka High Court ka Meghalaya yow dawa pynchitom ya ka sorkar jylla wym ye ko wow leh yei kaam yong ka wei da emkti ko leh heini wa jia waroh.
Discussion about this post