Hadien ar tayaw iwa jia ha Mukroh, ynne ka sngi ka Executive Committee ka Jaiñtia Hills Autonomous District Council (JHADC), hapoh i yahkhmat u CEM, u Thombor Shiwat da lai yooh kjat ki nadooh wa sdang u pood ka chnong Mukroh, Elaka Shiliang Myntang kawa haap hapoh ka jylla Meghalaya.
Manda poi ha chnong Mukroh, neiliang ki waheh ka chnong wa kynthup leh ya u Secretary ka chnong wa kiwi kiwi da kdaw ki ya u pood u ang ka chnong ya iwa tip kam i Mutha Siang Kwai iwa jngai du kamwa 3-4 km na ka Mukoilum Police Outpost ka jylla Assam wei ini i thaw toh katkam ka Map wa da yoh ka chnong nadooh u 1968.
Neiliang ki waheh ka chnong da kdaw ki wa ini i thaw ha u sarok Barato cha Mukoilum toh i thaw wa sdang u pood ka chnong namo Zero Point weiwa harood uni u sarok da em u sarok khyndaw uwa nadooh ki por nachwa nadooh ki waheh wasian.
Hadien wa liwan neini neiliang ki dkhot ka Executive Committee da chong yalang ki wa ki waheh wasian ka chnong khnang wow pachat wei wow ap u sñiaw yeiwa chem wei kwah ki paidbah wa chong chnong.
Hajrong i slem ka JHADC wow lai pait ya u pood ka Mukroh, neiliang u Thombor Shiwat da ong u wa i daw wa kongsan hi toh wa ka Council dang pynkhreh ko ya ki kot ki sla wa yatoh wa u pood ka chnong wei ympu kwah u hiar cha chnong mar sien jia i chah siat ki san ngut ha ka 22 tarik neibhah i kaam dang man i iwa sñiawsih ym du ya ki manyung tangwa wot ya ka chnong leh waroh kawi.
