I yakhih Non Cooperation Movement yong ki seiñbhalang ynne ka sngi da man ko kawa lai bait heiwa da sakhi ya kiwa boon ki yung krehkaam ka sorkar da man ki kiwa khang kam ka PWD, PHE, Jowai Municipal Board wa kiwi kiwi ha chnong Jowai.
Ki dkhot ki seiñbhalang kiwa da tymmoh yei dur da uiñ ki ha talawiar ka Jowai heiwa kiwa boon ki dukan ha Jowai leh da man ki kiwa khang.
Ki dkhot yong ki seiñbhalang da lai phah khang ki ya ka yung krehkaam ka PHE wa ha JHADC wei da tia won ki cha yung krehkaam u Deputy Commissioner heiwa da em chwa i yaklam wa kiwa yakhmat ki seiñ wa u sahep M.A. Challam, ADC.
Neiliang u ADC da ong u wa i wan dei tymmoh yei dur da pyntieñ pynsier ko ya ki khynnah wa ki bru heiwa da yoh leh ya kawi ujor na kawi ka yung krehkaam wa chah maham ki wakreh, deiwa pynrap wa ym toh u pynbor dam kreh ya ki bru neibhah ki leh leh ki yei kreh wa emkaam tangwa lada dam ki dei mon yong ki ym u leh heiwa ki seiñbhalang da ong ki wa lada sñiawthooh ki yei emkaam ka jaitbru da toh u mih ki yow pynyoo yei yatylli wei yei ya krehlang.
Hadien ini da khut ya ki dkhot ki seiñbhalang wow yaklam waka ADC ka D. Syngai ha kamra krehkaam yong ka.
Ini i yakhih ki seiñbhalang toh hadien wa chah siat yap ki 5 ngut ki tre chnong Mukroh ha ka 22 tarik uni u bnai ha ki pulit wa ki Forest Guard ka jylla Assam wei da khut wow dam lai kreh kam chibynta wow pynyoo yei wym bien u ya krehlang waka sorkar.
Chibet i janmiet nawon daw pynman kini ki seiñbhalang da i thang mombati kam ka dak wow sñiawlem ya kiwa da khlaad.
