Kawi ka kynthai khyllood Khasi ya kawa da murieh yei pyrtuid, da lait salit ko nei chah slaitbor ha uwi u bru uwa tip pyrtuid kam u Raju Baruah uwa man u tre ka Muscle Master Gym kawa em ha Thana Road Khyndailad (Police Bazar).
Kani ka kynthai kawa da yachem wa ki laad pathai khubor da khana ko wa itai i jia iwa da pynkhyrngiat ya ka, da jia ha i janmiet yong ka 10 tarik uni u bnai, wei da khana ko leh wa ini ym toh de i sien wa nyngkong wa utai u bru da leh u ya ini i jait kaam neibhah kiwi leh da ngat ki ha kani ka jooh kaam sih wa leh uni u bru tangwa ym nood ki wow ujor lane wow mih chakhmat.
Kani ka kynthai kawa lai pynjra doh ha kani ka Gym wei man ko leh kamjooh kawa kreh leh ha katai ka Gym da joo umkhmat hawa khana ko ha kiwa thoh khubor ya iyi wa da jia ha katai ka sngi wei nadooh wa sdang wow lai ha katai ka thaw.
Hadien wa jia ini, neiliang ka bei yong kani ka kynthai wa kiwa ha-yung da ujor FIR ki ha Sadar Police Station, wei neiliang ki pulit da kem noh ki ya uni u bru ha katai hi ka sngi. Ki pulit da lai ki leh wow kynreh ya katai ka Gym heiwa da chem wa em ki kamra wa da chna rieh na kylla ki yit, wei toh ha katai ka kamra wa utai u Raju Barua da thmu u wow leh ya ki kaam sih ya katai ka kynthai.
Neiliang yong kani ka kynthai wa kiwa ha-yung da dawa ki na ka aiñ wa toh u pynchitom deiwa eh ya uni u damok, khnang wa kam ini ym jia de i ya kiwi won.
Hawa yoh yutip hajrong ini wa jia, neiliang ki dkhot ka Khasi Student Union (KSU) Shillong Mihngi Circle da lai ki wow yachem wa kani ka kynthai wei ynne ka sngi ki dkhot ka seiñ da lai ki wow khang noh chi syndon ya katai ka Gym deiwa thoh lang ya ki kyntien beiñ ya uni u bru.
Neiliang u Vice President ka KSU Shillong Mihngi Circle, u Alquiz Kharbani da ong u wa ka seiñ daw booddien ko ya ini i kaam wei da dawa leh wa utai u damok toh u chah pynchitom deiwa eh ha ka aiñ, wei heijooh i por uwa yahkhmat ka KSU da maham ko deiwa eh ya kiwi ki Gym wa ym toh u chim kabu ya ki kynthai.
