Ka Meghalaya Human Rights Commission (MHRC) da pynlait ko ya u SP warim ka East Khasi Hills, u Rituraj Ravi khlem da pynchitom hadien wa kiwa ujor pyrchah ya oo ym ye ki u won hei por wa da booh da ka Commission yow bichaar ya ini i kaam.
Kam wow pynkynmoo wa u Ravi da chah pynbaad u wa da mut u wow rah dei bor ya ka Bindas Syiem cha Hospital heipor wa pynman ko yei yakhih chah thngan yow dawa pynchna ya u sarok Nongpoh-Umden chadooh Sonapur.
U Ravi deilang wa kiwi ki pulit da chah pynbaad ki wa da wan ki khlem yahlang wa ki pulit kynthai wei ki pulit wa wan da em leh kiwa da muaid.
Ya u Ravi da phah wow wan u ha ka 5 tarik heipor 11:30 i step heiwa oo da tyntait u ya waroh iwa chah pynbaad u.
Tangwa neidaw katwa yang leh ym poi kiwa ujor wa kynthup ya ka Purity Phawa kam kawa ujor waka Bindas Syiem kam kawa chah ktah, neiliang u Chairperson ka Commission, u Justice T. Vaiphei da ong u wym ye u lai chakhmat khlem da em kiwa ujor neibhah wym em kiwa wanrah yei sabut, kamtæ ym em laad de deiwi lait nei khang noh ya kani ka Case.
Chooh chooh da ong u wa da ini da pynlait ya u Ravi na iwon iwon i chah pynchitom neibhah da e por da iwa biang ya kiwa ujor wow wan ki.
Kiwa ujor da poi ki cha kani ka thaw hadien chi kynta wa da khang ya ka Case deiwa e daw wa sahkut kari ki neibhah wa wan ki na Ri-Bhoi cha kani ka thaw bichaar, kamtæ da pyntip cha ki wa lada kwah ki wow wai biang deiwi ya ka takit daw hap ki wow e Application deiwi wei daw hap u pyntip yeini leh cha u Ravi kamjooh wei ya ka Application hap ko wow lai lyngba ka DGP.
Kamtæ da booh ya ka 18 tarik uni u bnai kam ka sngi wow ap u sñiaw yei kyrpaad yow wai biang ya kani ka Case pyrchah ya Rituraj Ravi.
Discussion about this post