Ynñiawngut ki koidi kiwa dang em hapyrdi i chah bichaar namo ki Under Trial Prisoner (UTP) da yoh ki wow yut na Pasighat Jail wa em ha East Siang, Arunachal Pradesh ha ka sngi Bibar deiwa pynemkaam da u sumurit wa da dep tylliat (Chilli & Pepper Powder) wa i blooh ha ki pulit wa yang ya ki hapoh thanat.
5 ngut ki pulit wa yang sonteri (Guards) ka Pasighat Jail da mynsoo ki ha ini i jia iwa da jia heipor wa e ja sngi ya ki koidi kiwa da chim kabu yei wai ya ki thaw kset yow e ja.
Kini ki 7 ngut da brait ki pyn da u sumurit wa da tylliat wa i blooh wa da e hei ja ha ki khmat yong ki Guard heiwa da dat da choh ki ya ki heiwa uwi da mynsoo joor u neibynta i khlieh hadien wa dat ya oo da u tala wa kset ya ki koidi.
Da tooh leh ya ka Mobile yong uni uwa chah dat heiwa ki pulit da pynman ki ye thooh ya kini ki 7 ngut ki koidi kiwa da bna naam ha ki kaam damok.
Kini ki 7 ngut toh u Abhijit Gogoi, Taro Hamam, Kalen Apang, Talum Panying, Subash Mondal, Raja Tayeng wa u Dani Gamlin wei i thooh ya ki dang pteiñ i.
Ki pulit da yooluti ki wow kem smat ya kini neidaw wa em ka Curfew man-ka-sngi nadooh 3:00 waje i sngi hadooh 5:00 waje i step.
