Jowai: Ki pulit ka East Jaiñtia Hills wa kynthup yaki ANTF ka District deilang wa ki pulit ka Ladrymbai Out Post wa Umkiang Patrol Post da yoh ki wow kem drug YABA Tablet, Heroin wa u bhang waroh ynne ka sngi.
Heipor kamwa 5:15 waje i step kawi ka truck kit phniang kawa wan na Imphal yow lai cha Guwahati da chah pynsangeh ko ha Khliehriat Police Station wei hadien wa kynreh bha ya ka da chem ya kawi ka muna Plastic rong stem kawa em 1,02,000 tylli ki drug YABA/World is Yours Tablet kiwa khia kamwa 11 Kg kiwa chong dor palat T. 2 Klur wei da kem leh ya uwa yah wa uwa yarap ya oo wei i pyrtuid yong ki ym pu em pynbna neidaw wa dang pynman yaka takit.
Heipor 12:25 i step synyaw kawi ka Night Super Bus kawa em ya u number AS-01-E-2956 kawa wan na Silchar yow lai cha Guwahati da chah pynsangeh ko ha Khliehriat Police Station wei na kani ka Bus da chem ya le tylli ki tadong sabon wa em i drug Heroin iwa khia 30.63 Gram na ka muna uwi u bru iwa chong dor T. 15 Lak wei da kem ya oo katwa yei pyrtuid u ym pu em pynmih neidaw wa dang pynman yaka takit.
Heipor 2:15 i step synyaw kawi ka Night Super Bus wa em ya u number AS-24-C-9998 kawa wan na Silchar yow lai cha Guwahati da chah pynsangeh ko ha Khliehriat Police Station wei napoh yong ka da chem ya le synduk u bhang wa khia 18 Kg wa chong dor T. 2.5 Lak na ki le ngut ki bru. Da kem ya kini ki leh katwa yei pyrtuid yong ki ym pu em pynmih neidaw wa ka takit dang lai ko cha khmat.
Discussion about this post