Shillong: Ka yalang yong ka National Games Organising Committee (NGOS) kawa pynman ynne ka sngi wa khlieh da u Montri Rangbah, da chna ko ya le tylli ki Committee neibynta wow pynlai ya ki kaam wa yatoh wow pynman ya ka National Games ha kani ka jylla ha u snem 2022.
Hawa klam wa kiwa pathai khubor hadien wa da kut ka yalang, u Montri ka tnat yalehke u Banteidor Lyngdoh da ong u wa ka yalang da chna da ka Executive Committee wa khlieh da u montri ka tnat yalehke, ka Infrastructure Committee wa khlieh da u Chief Secretary wa ka Finance Committee wa khlieh da u Additional Chief Secretary.
Ka yalang da rai ko leh wow khut noh da ka EOI (Expression of Interest) wow khut ya ki Company Consultant wow chna ya kiwa emkaam ka National Games.
U Bantei da ong u wa iwa emkaam dooh katni toh wow khut noh ya ka EOI heiwa ki Company wa kiwi yow ye ki u phah yeiwa kwah ki u embynta ha kani ka kaam chwa wa ka sorkar u lai ko cha khmat ya kani ka kaam.
Da ong u wa hadooh katni ka tnat ka da lai ko chakhmat wow thooh thaw wei da em ki thaw wa haap u thied wei da em leh kiwa da e mynkna ki tre thaw wei ka sorkar kwah hi ko ya ki thaw wa e mynkna yow duna i lut i sep.
Ha kani ka lympung, daw em 35 tylli ki jait yalehke wow pynyalehke.
Discussion about this post