Kamwa man ha kylleiñ ki chnong ki thaw ka ri India, kiwa chong chnong dei sñiaw sarong da pynman ki yei lehkmen lehburom ya ka sngi kyrpang i yoh laitlooid ka ri ha ki dur ki rukom waphær waphær.
Kamtæ ka Dorbar Chnong Loomkyrwiang leh hei step yong ka 15 tarik deiwa ya chimbyntalang kiwa chong chnong nadooh ki khynnah hadooh ki waheh da sakhilang ki yei pynhær ya ka lama ka ri India.
Ha ka yalang wa tbian hei pynlai u Tremiki Lywait, Asst. General Secretary, da pynhær ya ka lama ka ri da u Daioolang Pakma, Asst. Waheh Chnong.
U Daioolang Pakma hei e kyntien heiyatoh wa ka Independence Day, ym ye u khlem da kyruiñ dien wow kynmoo ya kiwa yaleh laitlooid wa khroo ka ri, ka jylla wa ka jaitbru wei kyrpang leh niawtang u wow kynmoo ya ki kaam wa u Kiang Nangbah Khlawait ka ri Jaiñtia uwa da yap ha u tylle pasi ka sorkar phareng ha ka 30 tarik u Kmaichonglad 1862.
Chooh chooh da kyrsu kyntu u leh ya ki khon ka chnong wow man kiwa chong chnong kiwa yatylli, kiwa ya maya wei wow burom kylliang kam ki khon ka ri India kiwa im ha ka yurim yong ka synchaar paidbah.
Da pynphooh pynphieñ chooh leh ya kani ka sngi da i chimbyta ki khynnah wow pynyoo riam næ Independence Fancy Dress wa i puræ ya ka Independence Day Pledge kawa man ka luti wow khriñ yei pyrkhat pyrdaiñ kiwa chong chnong chaphang ka yurim wow man kiwa yatylli, ya maya wei ya burom khlem em i sñiaw yaphær niam yaphær jaitbru.
Discussion about this post