Kamwa da ya tiplang wa ka 5 tarik Naikhynde toh ka sngi khroo sngi kyrpang kiwa sikai kawa tip deiwi i kyntien kam ka Teachers’ Day, kamtæ kamwa man ha kiwi ki thaw sikai ki khynnah, ka Shlem Hikai Tynre, Seiñraij Jowai leh ha ka Khyllaw 4 tarik nohchariñ sngi da pynman ki i leh burom kyrpang ya kiwa sikai wa maya yong ki ha Seinraij Hr. Secondary School Jowai.
Ha ka yalang wa yoo chongkun yong kani ka janmiet hei pynlai u Budwanmi Dkhar wa ka Daman Lamar da yoh i klam pdiangburom na ka Dasien Pakyntein, i ngoohblai ngoohsyiem na ka Kongka Shylla wei hawakut won ka Wanchwa Sungoh da e ko ki kyntien sñiawngooh.
U Pa Dolloi ka Elaka Jowai, u Wh.Puramon Kynjing kam u kongsan yong kani ka sngi hei sakhilang u Raymond Nartiang, Pator Raij Jowai kiwa sikai wa ki manbei manpa da yaroh u yei chimkhia ki khynnah ka Shlem Hikai Tynre wow leh burom ya kiwa sikai kiwa man ka charak i che hei thij i pyrkhat chaphang i tip niam tip rukom, dustur riti.
Chooh chooh da khana pynsñiaw u leh yei parom wa tbian i lai luti ka Shlem Hikai Tynre kam uwa thwat luti nadooh u snem 1997 chirup wa ki waheh wasian ka Seiñraij wei sñiawsarong u leh wow yoo wa kat nang mih ki sngi ki Chlem Hikai Tynre nang mih ki haman ki chnong ki thaw iwa pynyoo yei dak yong i kyrmen ya ka ri wa ka jaitbru kamjooh ya ka pateiñ kawa dang tip u ksoh u kune u kheiñkor ya ka niam ka rukom ka dustur ka jaitbru Niawtrep Niawwasa.
Ki rukom lehke pynwynrngia kiwa da ku tyngkong ki khynnah wow pynyoo sap ha kani ka sngi toh ki chaadrwai sur tre, purea poitri wei pynyoo riam iwa da chimbynta chongchit da ki khynnah.
