Ka Dorbar Chnong Ialong ynne ka 15 tarik deiwa ya krehlang waka Village Organisation, waki Self Help Group wa em hapoh yong ka kiwa em kamwa 25 tylli da leh pynem burom ki ya ka Sngi Laitlooid yong ka ri India ha yung krehkaam yong u Waheh Chnong Ialong heiwa da yoh ya ki kyntien klam naka Beautiful Pale kawa man kam kawi na ki dkhot yong ka VO, pynbood sa ki kyntien na u Waheh Chnong ka Ialong u T. Ram Phawa uwa da e khublei Independence Day ya waroh ki paidbah yong ka chnong wa ka ri, uwa da klam leh hajrong ka yurim wa ka laitlooid yong ka ri chong ko ha i kitkhlieh yong kiwa yahkhmat ha ki 75 snem nachwa iwa ye u ong leh wa kani ka sngi u man ko ka sngi wow burom ya waroh ki khlawait ka ri nadooh U Kiang Nangbah, U Tirot Sing, u Pa Togan Sangma khamtam ya u Mahatma Gandhi uwa man leh uwi na ki bru pawkhmat ha ki por yakhun laitlooid ya ka ri wa ka jaitbru.
Da ong u leh wa kam kiwa chong chnong yong ka chnong da kyntu leh wow man ki kiwa ya maya, kiwa yatoh, ya tne kiwa em i sñiaw kylliang, kiwa man kam iwi neibynta yow wanrah ya ka chongsuk chongsaaiñ ha ki chnong, ki District, ka jylla wa ka ri hi waroh kawi, da kdaw u leh ya ki kaam pynroi nadooh i pynku kynrong ya ka chnong ka thaw hadooh ki kaam puræ puthi neibynta u wanrah ya ka chnong cha ka 100% Literacy Rate, da klam u leh heiyatoh wa i chait i khiah deiwa paan ya i ya krehlang, ka yatylli na ki paidbah neibynta u ye u yakhun ya kani ka khlam COVID-19 yow pyndooh jait noh ya ka napoh ka ri wa ka pyrthai hi waroh kawi.
U Waheh Chnong warim, u Bishar Shylla uwa man kam u kongsan ha kani ka sngi da pynhær u ya ka lama ka ri iwa pynbood da i sur maya ri (Jana Gana Mana).
Ha kani ka sngi burom ya ka ri da saam leh ya ki khusnaam cha ki Covid Warrior kitæ ki arngut ki ASHA kiwa da kreh mon sñiawbha doh wa mynsien wei man ki leh kiwa chlur ki wym jooh pep ya ki kaam yakhun ya ka khlam wot chi minit leh heiwa da e cha ki da ki Mementos Covid Warrior waka poisa mar T.5000 samen, u khoo mar 40 kilo samen, u dai, u salah wa ki that kup mar kawi wa e sñiawbha da uwi na ki waheh u Pyrkhat Shylla.
Neiliang yong ka Village Organisation da pynkup burom ko leh ya u Waheh Chnong warim u Bishar Shylla kam i dak yong i chakri yong oo ya ka chnong ka thaw ka imlang sahlang ha ki 13 snem wa da lai uwa da kreh chitom nadooh mynsien ha kitai ki snem kiwa da dep
Kamtæ ka Dorbar Chnong Ialong da e khublei Independence Day wasuk wa kmen biang ko ya ki paidbah hachwa u pynwai ya kani ka sngi burom da u Secretary yong ka Dorbar Chnong Ialong, u Masan War.
