Jowai: Ka Chutwakhu Urban Primary Health Centre, West Jaiñtia Hills ynne ka sngi da lehkmen ko ya ka World Health Day wa pynman ha Loompyrdi Iongpiah Community Hall, Jowai hajrong ka phang “Universal Health Coverage, Everyone Everywhere”.
Ka World Health Day toh kawa pynman yow pynsñiawthooh paidbah ya ka chait ka khiah kamjooh ki kjut ki chitom.
Kamtæ hajrong kani ka phang, ka Chutwakhu Urban Primary Health Centre ynne ka sngi da pynche ki chaphang ki kjut kiwa ym poor na uwi cha uwi namo ki Non Communicable Disease kam i kjut klongsnam, Cancer, i chitom riñ mynsien, i kjut chini neidaw wa kini ki kjut man ki kiwa dang ku katwa dang lai ki sngi ki por hapoh ka ri India.
Ka Dr. H. Uriah, Public Health Specialist da klam ko chaphang i ktah kini ki jiat kjut wa ki laad ki luti wow yaleh pyrchah ya ki. Da ong ko wow yaleh pyrchah yeini i kjut ym chong du haki Doctor, du ki Nurse, ki Asha tangwa dei yakrehlang waroh hi.
U Philemon Bamon, District Programme Manager MHIS da klam u chaphang ka Fourth Phase ka Megha Health Insurance Scheme (MHIS-IV) kawa katni da pynkrehkaam lang waka Ayushman Bharat-Pradhan Mantri Jan Arogya Yojana ka wow yarap T. 5 Lak kawi ka man yung lait noh kitu wa kreh sorkar jylla wa sorkar pyrdi wei lada ki paidbah em ki iyi iyi wa kwah ki wow kylli chaphang kani ka Insurance Scheme ye ki wow phone haka Helpdesk ha u number 0364-2507477 wei ye leh u phone ha u Toll Free number 1800104762.
U R. Ryngkhlem, Statistical Assistant da klam u yeiwa emkaam wow Register ya kiwa dang kha kamjooh leh ya kiwa da khlaad.
Ya kani yalang da pynman ya ki dong wa haap hapoh ka Chutwakhu Urban Primary Health Center wei da emlang leh ka Dr. (Mrs) E. Challam Additional District Medical & Health Officer, Jowai, kiwa kreh ka Chutwakhu Urban Primary Health Centre wa ki ASHA.
Ya yalang da pynlai da u A. Niangti, u waheh chnong ka Loompyrdi Iongpiah.
Discussion about this post