Ka chnat Arts and Culture ka sorkar Meghalaya deiwa ya krehlang wa ka Meghalaya Model United Nations, ynne ka sngi da lai booh syntu ki ha u mot u Tirot Sing wa em ha madan Fire Brigade, Shillong kam chibynta wow kynmoo warom ya ka lyngkhooh snem yap wa 186 u Tirot Sing.
Ini i leh warom yei chlur u Tirot Sing uwa da yieñ pyrchah yei synchaar ki pharæng da pynman leh kam chibynta ka “Azadi ka Amrut Mahotsav”, i lehkmen yei dap 75 snem i yoh laitlooid ka ri India.
Hawa e yei klam kam u kongsan, u F. R. Kharkonghor, Commissioner & Secretary, Department of Arts and Culture, ka sorkar Meghalaya, da pynkynmoo u ya kiwa ya emlang yeiwa da leh u Tirot Sing wa kiwi ki khlawait ha ka thma pyrchah ya ki pharæng. Da ong u leh ki khlawait ki jaitbru ri-loom kam u Kiang Nangbah wa u Pa Togan Sangma da man ki kam ki bynta wa emkaam ki parom hiar pateiñ ka yaleh pyrchah ha ki thaaiñ ri-loom kawa da sdang nyngkong chwa wow em ka yaleh pyrchah hapoh ka ri.
Da kdaw u leh yei emkaam lai pait biang ya i parom u Tirot Sing, heiwa da pynchlur u ya kiwa dang khynroo wow thooh bniah ki yow booh ya ka thup parom kawa man kam ka juk wa katni namo ka Digital Repository kawa emlang waroh kiwa da pynlang yow sñiawthooh waroh ki liang u Tirot Sing.
