Ka Seiñraij Khynroo khyllood Shangpung Pohshnong (SKKSP) da leh warom ko ya ka lyngkhooh snem yap wa 159 snem yong u Woh Kiri Dolloi Dhar, uwa man kam uwi na ki khlawait yong ka Ri Jaiñtia wa da chah siat yap ha u kuli yong ki chipai pharæng ha ka thma Jaiñtia 1862 ha ki wynta yong ka Elaka Shangpung ha madanthma Lummukut. Ya kani ka leh warom da sdang nadooh kani ka 4 tarik deiwa pynkhooid ya ka Iaw Muchai Shangpung.
Ynne ka 5 tarik heipor wa dang step ngiap ngiap heipor 5 waje da pynman ya ka yakob Phet-thong (Marathon) wa da ya chimbynta da ki khynroo khyllood yong ka chnong Shangpung kamjooh wa na kiwi tawan ki chnong.
Ha i por 10 waje i step da pynman ya ka suit ka choor da u Acting Dolloi wa ki Myntri ki khatri (Waheh Khad Ar Nor) yong ka Elaka Shangpung wei da pynbood won da i booh syntu da ka SKKSP, ka chnat Seiñraij Khliehmuchut wa Moolibang, ka chnat Seiñraij Khliehrangnah, ka JSU Shangpung Unit, ka KSU Shangpung Unit wa ka HANM Shangpung Unit ha u dur moo sahnaam yong u Woh Kiri Dolloi Dhar ha madanthma Lummukut Shangpung ha ka thaw wa chah siat yap u.
Da pynlai ya kani ka sarin yakutkaam da u Junom Suiam, u President ka SKKSP. Ya ka parom chaphang u Woh Kiri Dhar da khana da u Heibormi Sungoh uwa thoh kot ka thaaiñ; da yoh leh yei klam tbian na kitai ki chnat ki seiñbhalang waphær waphær, da pynbood won dei klam tbian yong u chongknor yong ki Myntri (Waheh Khad Ar Nor) ka Elaka Shangpung, u Waheh T.S. Phyllei.
Khaddooh da yoh yei klam e mynsien na u Waheh Treilang Suchiang, MDC ka thaaiñ hei ya emlang u Waheh R. Rabon, u Waheh Chnong ka Shangpung Pohshnong.
Da pynchongchit ya kani ka yakutkaam da i rwai tynre na ki khynnah skur ka Khad Ar Nor UP School Shangpung wa ka Chaad Pastieh da ki khynroo khyllood, pynbood won sa u Acting Dolloi chirup wa ki Myntri ki Khatri (Waheh Khad Ar Nor).
Khaddooh khadwai da yoh ya i ngooh i dem na u C. Langbang, Acting Dolloi Elaka Shangpung. Ya i kyntien e khublei da e da u Secretary, u Teilang S Manner.
