Ka Meghalaya da pynkut ko yei e reiñ ha ka Syed Mushtaq Ali Trophy 2021-22 deiwa jop da 92 Run ya ka Arunachal Pradesh ha Mangalagiri, Andhra Pradesh ynne ka sngi.
Da ini i jop, ka Meghalaya da yoh wa ar ko ha ka Group hadien ka Vidarbha kawa man leh du ka wa ye u pynrem ya ka Meghalaya na ki 5 tylli ki yalehke.
U Kishan Lyngdoh wa u Guest Professional u Chirag Khurana da kamai lang ki palat 100 Run hadien wa jop ka Arunachal Pradesh ya ka kylla khlem heiwa da jied wow phah Bat nyngkong ya ka Meghalaya.
U Kishan ynnin da kamai u 85 Not Out pyrchah ya ka Tripura, wei ynne da pynbood u da ka 82 Run na ki 52 bol wa kynthup ya 12 tylli ki 4 Run wa kawi ka 6 Run. U Khurana won da dat u 10 tylli kiwa da lai cha u pood yow kamai 78 Run na ki 48 bol.
Kini ki arngut da kamai ki 138 Run neibynta ka Wicket wa nyngkong kawa boon wa kamai u Lyngdoh tangwa hadien wa haap u, u Khurana da chim u ya i bynta wow kamai ya kiwa boon deiwa yohlok lang u wa u Punit Bisht (22) u wym em da yohlaad bha wow yalehke ha kani ka samoi neidaw wa lehbha u Lyngdoh wa u Khurana.
Ka Meghalaya da pynkut ko yei kamai da 194/3 na ki 20 Over, iwa man leh iwi na iwa boon dooh wa da ye ka jylla wow kamai ha ki yalehke T20 (Domestic).
Ka Arunachal kawa da rem ha waroh ki yalehke yong ka, ym ye ko u pyrchah bha heiwa ka kdong thong yong ka da kut noh da 102/6 na ki 20 Over.
Ka Meghalaya da pynemkaam ko 9 ngut kiwa kawang bol heiwa u Khurana da yoh u 2/12, u Ravi Teja 1/2, u Dippu Sangma 1/15, u Himan Phukan 1/16 wa u Akash Kumar Choudhary 1/25.
