Shillong: Ka Meghalaya da yachem ko waka Manipur ynne ka sngi haka Ranji Trophy wa pynman ha Mangaldai, Assam.
Ka Manipur da jop ko yaka kylla khlem wei da jied ko wow phah Bat nyngkong yaka Meghalaya kawa da lai wow kamai 235 Run (All Out). Tangwa ka Meghalaya da ka bol chwa wow kut ynne ka sngi da pynhaap ko 7 tylli ki Wicket ka Manipur kawa kamai 18 Run.
Ka Manipur hawa bol ko, da sdang ko deiwa pynhaap smat ya ki le tylli Wicket ka Meghalaya heiwa ha kani ka kynti u Dipu Sangma da ye u wow kamai du 4 Run. Kamtæ da wan wow pynskem yaka kamai Run da u Ravi Teja (90) wa u Punit Bisht (66) kiwa da kamai lang 127 Run yaka Wicket wa soo iwa da yarap yaka Meghalaya wow kamai 235 Run.
U Sanjay Yadav, da ka Bat da kamai u 44 Run wei da ka bol da pynhaap u ya soo tylli ki Wicket ka Manipur deiwa e 12 Run, katwa u Abhay Negi yoh u 3/1 yow ieh yaka Manipur da 18/7 chwa wow kut ka yalehke.
Haka U-19 Cooch Behar Trophy, ka Meghalaya da yachem ko waka Sikkim ha Tezpur, heiwa ka Sikkim emkaam ko sa 172 Run yow jop manda pteiñ ka yalehke mynstep ka sngi.
Deiwa pteiñ ynne ka snga na i 74/1 hawa kdong ya iwa kamai ka Meghalaya haka Innings wa nyngkong iwa 282, ka Sikkim da ye ko wow kamai 213 Run deiwa haap lut ki Wicket ynne ka sngi. Neiliang kiwa kawang bol ka Meghalaya u Aaron Nongrum da yoh u 4/39, u Frickey Sangma (2/3), u Bipin Ray (2/36) wa u Aryan Borah (2/62).
Ini da pyntam ko yaka Meghalaya da 69 Run chwa wow sdang ki yaka Innings wa ar yong ka heiwa ha ini won da chah pynhaap lut ki Wicket deiwa kamai du 117 Run, heiwa u Divyansh Rajput uwa yoh yaka spah Run haka Innings wa nyngkong da kamai boon dooh u da 61 Run.
Kamtæ yaka Sikkim da booh thong 187 Run yow jop wei da yoh ko 15/0 chwa wow kut ka yalehke.
Discussion about this post