Ka MGPS Junior and Amateur Tour 2021 da sdang yaka ynne i step heipor 7:30 daka Event 1 ha Shillong Golf Course. U Rocky Hek, Executive Member, MGPS da wai u yaka lympung deiwa dat nyngkong yaka bol.
Ka sngi nyngkong yong kani ka Tournament wa ar sngi da em 14 ngut ki Junior kiwa da chimbynta haka 1,2&3 Junior Category. Heiwa ya kani ka Tournament da pynwandur da ka Meghalaya Golf Promoters’ Society (ka State Association neibynta ka Golf ha Meghalaya) deiwa kyrchaan ka Shillong Club Ltd. (Golf Section). Ka MGPS toh kawa da tipmit daka Indian Golf Union (IGU) kawa da kreh neibynta wow pynku yaka yalehke Golf haka thaaiñ.
Ka IGU toh ka National Sports Federation neibynta wow pynku yaka yaleh Golf. Da kyrchaan leh ya kani ka Tournament daka Champs for Life Academy, Golf Trade waka Varun Beverages. Ka bynta wa ar waka bynta wa khaddooh kani ka lympung daw pynman haka 27 tarik uni u bnai iwa daw pynbood sa i saam yaki khusnaam cha kiwa jop haka sngi wa bood.
Kiwa da tyrchaaiñ ynne ka sngi toh kiwa dang 5 snem kitæ u Aryan Bajaj, Mamatwa Jhunjhunwala wa Sharanya Bajaj.
Haka Category 1 da tam u Thongvanglen Hangsing uwa yoh 91, pynbood sa u Sidhant Singhania 94 wa u Shaurya Goenka 102.
Haka Category 2 da tam Da-I-Paya Dkhar wa yoh 52, u Shivaai Agarwal 55, u Deep Bajaj 56, u Ryan Pargal Lyngdoh 59, Muskan Singhania 65 wa u Pratham Jhunjhunwala 70.
Haka Category 3, uwa dang 5 snem u Aryan Bajaj da tam u deiwa yoh 31 pynbood sa Mamatwa Jhunjhunwala 43 wa Sharayna Bajaj 45.
