15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1

Lehburom ka JSU ya u President wa u Organising Secretary warim yong ka

0 Comments

Jowai: Ka Jaiñtia Students Union ynne da pynman ko ya ka yalang yachemlang yong ki dkhot yong ka kamjooh leh ka lehburom ekhublei ya u President warim yong ka u Rikut N Parieñ uwa da mih noh na ka seiñ chirup wa u Organising Secretary yong ka, u Nujorki Sungoh u wow yakhun ya ka Election MLA ha uni u snem na 4-Mowkaiaw Constituency.

Ya kani ka yalang da pynman ha Hall ka Marian Hills Higher Secondary School, Jowai wei da pynlai ya ka yalang da u General Secretary ka seiñ u Jersome Shylla heiwa u Addional SP ka West Jaiñtia u P. Syiem da man u kam u kongsan, hei emlang ka President ka JTTA ka Robila Mylliemngap, u President ka HANM u NC Shadap wa kiwi kiwi.

Da yoh yei klam wa tbian chaphang ka seiñ na u dkhot warim ka seiñ u Heibor Pariat. Kiwi kiwa da klam da e ki ki kyntien sneiñ kyntu ya kiwa kitkaam wa ki dkhot ka seiñ wa katni.

Kam u kongsan u Syiem da ong u wa katni emkaam bha wow em ki seiñbhalang kiwa ye u kreh neibynta ka imlang sahlang wa i roi i paar,

Da pynkymoo u ya kiwa em wow man ki kiwa yatylli wei ki wow em i mynsien wow kreh neibynta i bha i miat yong ka imlang sahlang.

Da e khublei u leh ya u Rikut Pareiñ uwa da e i chakri hadooh kamwa 15 snem neibynta ka seiñ wa ka imlang sahlang.

U Rikut N Parein hei klam da khana u ya ka parom nadooh wa psiah u cha ka seiñ heiwa da yaleh ka seiñ u wanrah chiboon ki kaam neibynta wow kyntu kynrong ya ka imlang sahlang wa ka ri-loom Jaiñtia waroh kawi kam ka MBOSE wa MPSC Cell ha Jowai, da sdang ya ka Arts & Culture Department hapoh ka JHADC, ka Non Incumbency Certificate wa ye u yoh na JHADC wa kiwi kiwi.

Da kyntu u ya kiwa kitkaam wa katni kamjooh leh ya ki dkhot wa i psiah ki cha ka seiñ ymtoh i wow yoh myntoi samen tangwa toh u kreh neibynta ka imlang sahlang wei u kreh ki na mynsien.

Ya kani ka yalang da pynkut da ki kyntien khyblei na u Organising Secretary ka seiñ uwa katni u Yoosar Kynjing, ha kani ka sngi ka seiñ leh da kitbok kitrwiang ko ya u Nujorki Sungoh wow poi u cha ka thong i jop manda yakhun u ya kani ka Election MLA.

Previous
Next

0 Comments

Leave a Reply