Ka Dorbar Chnong Ialong ynne ka sngi deiwa ya krehlang wa ka All School Ialong Association (ASIA) wa ka Village Organisation deilang ki Self Help Group, ka Village Employment Council da pynman ki yei lehkmen ya ka sngi laitlooid ka ri India ha ka yalang wa da pynman ha pchem ka Ialong Secondary School, Ialong wa em ha Kseh Sylle.
Da pynlai ya ka yalang da u Chatis Phawa, Assistant Teacher ka Ialong Secondary School Ialong wei da yoh i khublei wei pdiang burom na ka R. Bamon, Headmistress Jowai Presbyterian Secondary School Ialong
Neiliang u Waheh Chnong, u Ram T Phawa da e khublei Independence Day wasuk wakmen u ya ki paidbah waroh khamtam ya ki khon yong ka chnong Ialong wa ka ri deiwa pynkynmoo leh ya khlawait ka Ri Jaiñtia, u Kiang Nangbah neitæ u Tirot Singh, u Patogan Sangma khamtam ya u Mahatma Gandhi uwa em hakhmat wow yaleh yei laitlooid ka ri.
Da khana u wa ka Dorbar Chnong Ialong lyngba ka EC wa thymme nadooh ka 13-03-21 deiwa ya krehlang wa ki dkhot ka dorbar chnong hapoh 1 snem 5 bnai da ye ko wow wanrah yei chongsuk chong saaiñ deiwa pynbait ya u pood chnong wa ka Tuber Chohchrieh deiwa ya soi soskular.
Ha ka 10-10-24 ka EC da ye ko wow wanrah ya ki kaam pynroi nadooh u kyntu kynrong yei yoh i kot hapoh chnong pohthaw khmatam ki luti ki syngkieñ lyngba ka Scheme MGNREGS kamjooh na ki Scheme yong kiwa mihkhmat cha ka dorbar chna aiñ.
Heiyatoh wa i chait i khiah da wanrah leh i pynsuk neibynta kiwa chitom kiwa mynsoo deiwa yoh ya ka Ambulance nadooh ka 10-08-21 lyngba ka Scheme SRWP wei kattæ da jan wow pyndep yei chna ya ka Sub-Centre neibynta u pynsuk ya ki kynthai khamtam ya ki manbei.
Da wanrah leh ya i roi i paar ha ki thaw puræ yong ka Ialong UPP&SS Ialong wei deiwa yoh yarap lyngba ka MPLADS kamjooh na ka SRWP daw chna pyndep ya ka School Building heiwa ha u bnai December u pyntikna wow yoh yei pynmiat (Beautification) kani ka yung skur, heijooh i por da pynlait lut ya ka tulop kiwa sikai ha waroh chi snem ha ka Account yong ka SMC kawa dapoi Rs.7,66,000.
Yeini waroh da leh ha katæ ka rukom wow pynku ya ka puræ puthi, yow pynku ya ka Literacy Rate hapoh ka chnong yow lait u em kiwa dam skur chiteiñ por.
Ha uni u snem ka SSLC Result leh da yoh ko 100% ka Pass Percentage wei da man ko iwa sñiawsarong ya kiwa sikai wa ka SMC khamtam ka chnong Ialong hi waroh kawi. We kani u man ko leh kam ka nongmuna ya kiwa daw yaleh SSLC ha u snem 2027.
Ha kani ka sngi, u Phasmon Dkhar uwa man leh u MDC warim ka JHADC da man u kam u kongsan heiwa da pynhær u leh ya ka lama kari wei da pynbood da i rwai ya ka National Anthem.
U Phasmon kam u kongsan da kyntu u ya ki khon khynroo ka chnong wow bood ya ki dak kjat ki bru chlur yong ka ri. Da saam u leh ya ki khusnaam cha ki khynroo khyllood kiwa da lehbha ha ka puræ Engineer, kiwa pyndep Degree, kiwa poi chakhmat ha ka HSSLC wa SSLC wei da pynkup burom leh ya kiwa yalehke namo ki Sports Person wa kynthup ya u Kitboklang Pale (Footballer) wa u Daboimiki Mulieh (Long Distance Runner).
Neiliang ka Dorbar Chnong Ialong da e khublei Independence Day wasuk wakmen ko ya ki paidbah hachwa u pynwai ya kani ka yalang da u Lionel War, Assistant Teacher ka Lutituber Govt. L.P. School Ialong.
Discussion about this post