Ka Khasi Author’s Society (KAS) deiwa ya krehlang wa ka chnat Arts and Culture, ynne ka sngi 18 tarik da lehkmen kynmoo warom ki ya ka lyngkhooh sngi yap kawa 81 yong u Soso Tham, kawa da pynman ha Conference Hall yong ka St. Anthony’s College deiwa emlang u chongknor ka yung dorbar chna aiñ ka jylla, u Metbah Lyngdoh, u Prof. D.R.L Nonglait uwa man u President ka KAS, u Dr. Davidson Diengdoh uwa man u Principal ka Jaitntia Eastern College heiwa da emlang kiwa ha yung ha sem yong u Soso Tham.
Hawa klam kam u kongsan ha kani ka sngi, u Metbah Lyngdoh da kynmoo tympang u ya iwa da e u Soso Tham hei toh i tar yong ka ri Khasi Jaiñtia, heijooh i por da pynsñiaw u yei sñiawsarong wei kmen wow yoo wa boon ki khynnah khynroo da wan ki chakhmat hawa yatoh wa ka Subject Khasi.
U Metbah da pynsñiaw u leh yei sñiawsih wa boon na ki kyntien Khasi da sdang ki wow wiar neibhah wym kheiñ snep chooh hanla i man i ki Khasi, tangwa da pynsñiaw u leh yei kyrmen wa em boon ki skur wa ki skurbah kiwa dang ya pynim ya ka ktien ka thylliej u Khasi.
Ha iwi i liang u Metbah da yaroh u yei pyrchang yong ka Khasi Authors’ Society wow pynneh pynsah ya ka ktien ka thylliej, wei wow e myntoi ym du ya ka pateiñ tangwa wow yarap leh ya ki pateiñ ki wow wan. Ha i jooh i por da ong wa kam uwa yahkhmat ka jylla daw chimkhia u wow pynpsiah ya ka ktien Khasi ha ka 8th Schedule yong ka riti synchaar ka ri India.
Ha kani ka sngi u Metbah Lyngdoh da saam u leh ya ki khunsaam cha ki 40 ngut ki khynnah puræ kiwa leh bha ha ka ktien Khasi ha ki kyrdan puræ waphær waphær.
