Ka Khynroo Khyllood Chilliangraij Niamtre Committee (KKCNC) kam kawi na ki chnat krehkaam ka Dorbar Chnong Chilliangraij kawa da pynkhai pynyieñ ha ka yurim wow pynskem pynskit pynneh pynsah ya ka niam rukom, dustur riti katkam wa da yoh sikai nadooh ki manchwa longchwa.
Ha ka 24 tarik Naikhynde hapyrdi i sakhilang ki khon ka Ñiamtre na kiwi ki dong ki chnat, da pynman ko ya ka yachemlang wa kyrpang ha Yungwalieh kam ka dak i leh burom ya ka lyngkhooh snem wa 11 i lai luti ka Khynroo Khyllood Chilliangraij Niamtre Committee.
Ya kani ka sngi dawan sakhilang da u O.H. Toi, President Seiñraij Jowai kam u kongsan neitæ u E.M.H. Passah, Vice-President Seiñraij Jowai kam u symbood kongsan chirup u Sambood Siangbood, Langdoh Raij Jowai, u Arwotki Sumer, General Secretary Seiñraij Jowai wa kiwi ki waheh wasian, manbei manpa, khynroo khyllood yong ki dong ki chnat waphær.
Kam wow kdar luti ya ki bynta wa chakhmat yong kani ka yalang hei pynlai ka Jukiru Shylla da yoh i ngooh Blai ngooh Syiem na ka Da-I-Waka Dkhar neitæ pynbood won i khana pynsñiaw ya i parom wa tbian ka KKCNC na ka Nobel Dkhar, ki kyntien sneiñ kyntien kroo na u D.H.Pde, waheh chnong Chilliangraij, i klam kyrpang na ka Dakawanha-I War hajrong ka phang ‘Yatoh Jingmut’ neitæ i klam e mynsien ya ki khon ka Niamtre na u Arwotki Sumer hei pynkut won ki kyntien sñiawngooh na ka Hanlada Rngad, Secretary KKCNC.
U O.H. Toi hei klam kam u kongsan da yaroh u ya kiwa yahkhmat ka KKCNC kiwa da ye u leh yei kaam wabha tam neibynta i burom u Trekirot wei da kyrsu kyntu u leh ya ki khon khynroo khyllood wow man kiwa sajiar syndong bha yei longbru manbru ha kani ka juk ka por wa katni kawa kat chawa pait wa kyruiñ dap sa du i tynjooh yong i sih i roi iwa wan ha ki dur ki rukom waphær iwa ktah ya ka yung ka sem kamjooh ya ka imlang sahlang.
U E.M.H. Passah hei klam kam u symbood kongsan da khana u chiboon ki buit krehkaam heiyatoh wow ye ka Committee u lai chakhmat wei wow kreh yei kaam katkam i yah ka juk ka por wei chooh chooh ong u leh kynmoo i yakrehlang dei yatoh yumut wei sñiaw para-i toh ka luti wow ye u poi cha ka thong yong i miat i bha hapoh ka imlang sahlang yong ka dong ka chnong.
Ya kani ka sngi da pynphooh pynphieñ wei pynchongchit pynwyrngia leh da ki chaad wa da chimbynta da ki khon khynroo khyllood ka chnong Panaliar, KKC Seinraij Jowai wa ki khon ka chnong Chilliangraij neitæ da em leh i pynkup burom wa kyrpang ya u Lakhon Dkhar neiliang ka Seinraij Jowai wa i saam ya ki khusnaam cha ki khynnah wa jop ha ki yakob waphær.
Discussion about this post