Ka Meghalaya & Greater Shillong Progressive Hawkers and Street Vendors Association (MGSPHSVA), ka seiñ yong kiwa chongdai madan da pynman ko ya ka lehkmen ya ka lyngkhooh snem kawa ynru ha Anton Hall, Don Bosco Square Laitumkhrah Shillong ynne ka sngi.
Ha kani ka sngi da emlang leh ka D.B.S Mukhim kawa man ka Assistant Food Commissioner ka sorkar jylla wa ka Wanpynhun Kharsyntiew kam kiwa chah khut sñiawbha wa ki kongsan.
Palat hajar ngut kiwa chongdai kiwa man leh ki dkhot yong ka MGSPHSVA da poi ki cha kani ka lehkmen heiw da pynman leh ya ka yakob chaad wa i pynyoo yei sap namo ka Talent Show wei da saam leh ya ki khusnaam cha kiwa jop.
Neiliang ka Mukhim hawa e yei klam da ban joor ko wa kiwa chongdai madan wa khamtam kiwa dai baam u man ki kiwa lehkhooid wei wow tymmoh bha yei baam yong ki. Da yaroh ko leh ya ka MGSPHSVA kawa da ya krehlang waka yung krehkaam yong ka. Heijooh i por ka MGSPHSVA leh da e ko yei burom ya kiwa mihkhmat yong ka sorkar deiwa kyntu wa ki wow pynyoo ya ki kyndon ya ka kiwa chongdai madan.
Ka Wanpynhun da e ko ya i klam e kyrmen deiwa kdaw yei hok yong kiwa kreh mylla wa kynthup ya kiwa chongdai madan nadooh i chait i khiah, i sumaar sukhær, ka bai baam tymmen, ka Ration Card wa kiwi de. Da ong ko wa kini toh ki hok tynre yong kiwa chong chnong wei toh u dawa wa kini u poi ki hadooh tyngkong yung yong kiwa kreh mylla.
Ha ka sngi chwa, ka MGSPHSVA da pynman ko ya ka e sikai chaphang ki aiñ wei kammon wow ya krehlang wa ka imlang sahlang kawa da e sikai da u Dr. Sunil Kaul uwa naka Indian Public Health Foundation.
