Kam chibynta i lehkmen dap 50 snem yong ka jylla Meghalaya, da yoh wow pynkupburom ya ar ngut kiwa yakhmat ya ka yakhih Hill State ka jylla, kitæ u Hopingstone Lyngdoh (baam kwai ha dwar u Blai) wa u Fuller Lyngdoh Mawnai (baam kwai ha dwar u Blai) wa 16 ngut ki Volunteer yong ka yakhih Hill State da ki bor pynlai District yong ka Eastern West Khasi Hills District ha ka yalang wa pynman ha Madan Mot Tirot, Mairang Mission, Mairang ynnin ka 28 tarik heiwa u Lamphang ka yung dorbar chna aiñ ka jylla, u Metbah Lyngdoh da man u kam u kongsan deiwa emlang u Montri ka chnat Water Resources ka jylla, u Brolding Nongsiej uwa da wan kam u symbood kongsan.
Kiwi won kiwa wan cha kani ka yalang kynthup ki ya u MDC ka Mairang-Nongkhlaw, u Batskhem Ryntahiang, u Deputy Commissioner ka Eastern West Khasi Hills Distrik, u W. Nongsiej, u Superintendent of Police ka District, u M.B Syiem, u Syiem ka Hima Nongkhlaw, u Pa’iem PM Syiemlieh, u Syiem ka Hima Myriaw, u Pa’iem K. Syiem, u Syiem ka Hima Mawiang, u Pai’em N. Syiem, kiwa yahkhmat chnong ka thaaiñ, ki warep, ki dkhot yong ki seiñ krehlang namo ki SHG, kiwa sikai skur wa ki khynnah skur.
U Metbah Lyngdoh da klam u chaphang i chynna jngai yong kiwa yahkhmat ka yakhih Hill State ka jylla kiwa da kreh dohyap wei wow pyntikna yow yoh ya ka yong i ka jylla kawa yahaap wa ki dustur wa rukom yong ki jaitbru ri-loom.
Chooh chooh, u Metbah da ong u wa kani ka lehkmen pynyoh ko ya kiwa chong chnong ya ka kabu wow kyruiñ dien cha ka mynnor yong ka jylla, ka lai luti yong i roi i paar ha kiwa boon ki liang lyngba ki phaw snem wei man ko leh ka kabu wow pyrkhat kammmon wow kyntu chooh chooh ya ka jylla ha ki 50 snem wa daw wan. U Metbah da khut da wer u leh ha kani ka yalang yei ya krehlang chitylli da waroh lang neibynta ka roi ka ku yong ka jylla Meghalaya.
Hawa klam hajrong ka Ginger Mission yong ka jylla ya kawa dang wai ini wadep da u Montri Rangbah ka jylla, u Conrad K Sangma, u Metbah da ong u wa kani ka Mission daw wai laad, wai luti ko yow kyntu ya ka yoh ka kot ki warep yong ka District wa ka jylla hi waroh kawi neibhah lyngba yong ka daw ye wow kyntu ya ka bor pynmih syiñ yong ka jylla wei wow chalan ya oo wow chna kiwi de ki jait baam.
Ha kani ka sngi da yoh i pynche hajrong ka Ginger Mission na ka chnat Agriculture wei leh hajrong ka Public Distribution System na ka chnat Food & Civil Supplies ka jylla. Da yoh leh wow saam ya ki symbe syiñ hapoh ka Scheme Ginger Mission-Spices Development Scheme 2022-2023 cha ki warep ka thaaiñ.
Kiwi kiwi de ki wa da leh ha kani ka sngi kynthup ki ya ki dukan wa da booh da ki chnat sorkar waphær waphær wa da ki SHG wei da em leh ki rwai ki chaad tynre na ki khynroo khyllood ka thaaiñ.
Da yoh leh wow saam khusnaam da ki kynrem ki lyndan cha kiwa jop yong ka yakob phet Marathon, Quiz, thoh Essay wa Painting ya kiwa da pynman kam chibynta yong kani ka lehkmen.
