Jowai: Ka Meghalaya People United Front (MPUF), ynne ka sngi da lehkmen ko yow kynmoo warom yei dap 10 snem wa da pynkha yaka seiñ.
Ya kani ka seiñ da pynkha ya ka ha ka 6 tarik u Kmaichonglad 2010, wei kam ka seiñ da leh ko chiboon ki kaam wow e yarap cha ka imlang sahlang.
Ha kani ka sngi neiliang u President ka seiñbei u D. Laloo da pynsñiaw u yaki phang wa hakhmat dooh yong ka seiñ itæ wow pynbait ya u pood u ang yong ka jylla, neibhah hadooh kattæ ka jylla ym pu em ko ya u pood u ang wa tikna wei da beiñ u leh yaka sorkar ha ki por wa nachwa wa da pdiang ki ya ka jylla khlem em u pood.
Ha i jooh i por da kyntu u ya waroh ki dkhot yong ka seiñ wym toh u pynsñiaw ya ki kyntien maya ri khlem da em ya ka yurim wa skem, kamtæ da kyntu u ya ki para dkhot waroh wow man kiwa em ka yurim ha ka luti kawa bait wa kawa sakhiat.
U President ka Khliehriat Circle u Kyrshan Blah da ong u kam ka seiñ kreh ki neibynta wow pait ya i eh yong kiwa dooh wa rangli, da klam u leh chaphang ka ILP deiwa kyntu ya waroh ki seiñbhalang hapoh ka jylla wow emlang hapoh ka wi ka chatri khnang wa ini i dawa daw mankaam ko.
Katwa neiliang u kongsan u Nidamon Chullet, Working President ka NPP Jaiñtia Hills District da kitbok u yaka seiñ wow nang ku ko sam chakhmat ha i chakri da i yatylli lang kawi hawa em kiwon kiwon ki kaam wa bha yong ka seiñ.
Ya ka yalang ha kani ka sngi da pynlai da u Joe D. Siangshai, kiwi de kiwa klam kynthup ki ya u President ka MPUF Ribhoi District u J. Sohtun, General Secretary seiñbei u Aimonbha Syad, President JYF seiñbei u Ombor Taring, President ka Shangpung Unit u Timingroi Lakhmi, President ka Pamra Paithlu Unit u Shanbor Rymbai, kiwa yahkhmat ka West Khasi Hills District ka F. Marngar, ka President MPUF-Women’s Wing-West Jaiñtia Hills ka Ridaroi Shadap wa kiwi.
