Shillong: U MLA na South Shillong uwa man leh uwa yahkhmat ka BJP, u Sanbor Shullai da ong u wa toh i hok kam ki jaitbru ri-loom wow dawa pynkrehkaam ya ka Inner Line Permit (ILP) kamwa da e cha kiwi ki jylla ka thaaiñ mihsngi da ka sorkar India.
Da ong u wa kam uwa yahkhmat nadooh nachwa wa man u kam u dkhot ha ki seiñbhalang da embynta u wow dawa ya ka ILP ha kitu ki por, wei katni kam uwa yahkhmat paidbah wei kam u bru samen kyrchaan u ya ini i dawa, tangwa da ong won u wa chong ha i kti yong ka sorkar pyrdi wow e yei mynjur.
Da ong u wa ye u man wa ki paidbah pyrkhat bakla ki wa u Sanbor em u ha ka BJP te mylliñ u ya ka phang yong ka jaitbru, wei pynrap u wa kam itæ i pyrkhat man i iwa bakla neibhah ha oo, ki Party man ki du kam ki Uniform, tangwa ki padibah toh u pait ki ya ka yurim.
U MLA ka BJP da kubur u wa em i pynslem wow e ya ka ILP ha ka jylla wot hadien wa em i dawa wa joor na kiwa boon wa lang, deiwa ong leh wa lada ya ka jylla Manipur ye wow e, iyi i eh wow e ha Meghalaya.
Ha i jooh i por u Sanbor da ong u wa ha u Duiatra (Jan) wow wan da lai u wow booddien ya ini i ka kaam cha Delhi wei wow thooh yutip lada yoh næ ym yoh ya ka ILP wei ka sorkar pyrdi toh u e ko yei daw wa che, deiwa ong chooh chooh wa ha ini i lai cha Delhi daw booddien leh ya kiwi ki phang wa emkaam jhan ha ka jylla.
U MLA ka BJP da ong u leh wa kiwa mihkhmat wa da jied da ki paidbah ym toh wow kut du hawa chong chuki, tangwa toh i kamram yong waroh 60 ngut wow lai thooh cha Delhi, wei da ong chooh chooh wa hawa lai Delhi ym toh wow lai beh du ya ki Scheme tangwa toh u booddien leh ya ki kaam ka jylla.
U Sanbor da kyrchaan u leh ya i e yumut ka CoMSO, deiwa ong, hawa man kam kiwa mihkhmat toh u em yei kitkhlieh leh ya ki phang kiwa ktah ya ka jaitbru. Da pyntip u leh wa da dep wow yaklam leh wa u Montri Rangbah, u Conrad K Sangma wa i e yumut ki seiñbhalang man i iwa toh.
