Ka Seiñ Kur Shadap Manar (Central Body) haka 27 tarik uni u bnai da pynman ko yaka Durbar Kur Shadap Manar kawa chisien chi snem kawa jooh pynman ha ki chnong waphær hapoh ka Ri-loom Jaiñtia wei ha uni u snem da pynman ya kani ka dorbar ha chnong Barato kawa man leh kam wow lehkmen yei daw 25 snem namo ka Silver Jubilee yong ka Seiñ Kur Shadap Manar.
Ya kani ka Dorbar da sdang hei yahkhmat u President ka Seiñ Kur, u Herlington Shadap Manar wei da emlang u MLA ka Mowkaiaw, u Nujorki Sungoh kam u kongsan deilang wa u MDC ka Barato-Mukroh, u Aiborlang Shadap kam symbood kongsan uwa man leh u dkhot ka Seiñ Kur.
Da ya emlang leh waka Rimaya S. Manar, MCS, Director of DERT ka sorkar Meghalaya, u Pastor Banker Shadap, u Pastor Callme Manar, u Officer In-Charge ka Jowai Police Station wa kiwi kiwi ki heh sorkar.
Ha kani ka sngi da pdiang sñiawbha ya kani ka dorbar da u Pastor Banker Shadap ryngkat i rwai pdiang na ka Seiñ Kur Shadap Manar Barato Unit, wei hadien itæ da pynlait paidbah ya ka Souvenir Silver Jubilee yong kur da u Adviser ka Seiñ Kur, u Borin Shadap. Neiliang won u General Secretary ka Seiñ Kur, Goldwin Shadap da puræ u yei parom ka Seiñ Kur wei da e u leh yaka dorkhat cha u kongsan yow paan yarap wow chna ya ka Museum ka Seiñ Kur ha ka chnong Barato kawa man ka chnong yong ka Syiem Latympang.
Da yoh leh yei klam na u kongsan, u symbood kongsan wa kiwi de heiwa u kongsan da kular u wow yarap katwa ye yow pynmankaam yei thrang ka kur wow chna ya ka Museum.
Ha kani ka dorbar da pynkup burom ya ki Founder Member yong ka Seiñ Kur wei da ah leh ya u Silver Jubilee Cake da ka Rimaya S. Manar wa da pynkhreh da ka seiñ kynthai yong ka Seiñ Kur Barato Unit.
Da pynphooh pynphieñ ya kani ka dorbar kur da ki rwai na ki Unit kur waphær waphær kam na ka Iooksi Unit, Mowkaiaw Unit, Jowai Riwar Unit, Shangpung Unit, Barato Unit wa naka Narwan Unit.
Da yoh leh wow saam khusnaam cha ki khon ka kur Shadap Manar kiwa da lehbha ha ki Exam waphær waphær wei da pynlut ya ka yalang dei e khublei na u President Waheh ka Seiñ Kur wa ki chaad i rwai wa sñiawsuk na u Nitajan Shadap Manar uwa naka chnong Shangpung.
Discussion about this post