Ka Seiñ Niamtre Khynnah Purae Shillong ha ka 27 tarik uni u bnai da pynemburom ko ya ka sngi Lyngkhooh Snem wa le yong ka seiñ ha ka yalang wa da pynman ha U Soso Tham Auditorium Shillong heiwa u Sanbor Shullai (Arts & Culture Minister) da wan emlang u kam u kongsan katwa u Wanroy Challam (Chief Engineer PWD Building) da wan u kam u symbood kongsan chirup wa u Dolloi ka Elaka Jowai, u Puramon Kynjing, u Dolloi ka Elaka Raliang, u C. Lyngdoh, kiwa kitkaam na Seiñraij Niamtre Shillong, Seiñraij Jowai wa na kiwi ki Seiñraij.
Ya ka yalang da pynlai da u khynroo Budwanmi Dkhar wa ka khyllood Ebiangmikdaka Laloo heiwa neiliang u Longchwa Pyrbot, President ka seiñ da e u ki kyntien pdiang burom katwa u Budwanmi Dkhar, General Secretary ka seiñ da pynsñiaw u yei lai luti ka seiñ.
Ya ka ngooh ka dem da e da ka khyllood Mang-i-Daka Passah, Arts & Culture Secretary.
Neiliang u Dr. Omarlin Kyndiah, Adviser ka seiñ da pachat u ki kyntien heiyatoh wa kani ka sngi. U Dr. Shngaiñki Pyrbot, General Secretary Seiñraij Niamtre Shillong leh da e u ki kyntien e mynsien.
U Pa Dalloi ka Elaka Jowai da e u ki kyntien kyntu kynrong ya ka seiñ deiwa sneiñ wei pynyoo luti ya ki wow toor chakhmat.
U Wanroy Challam hawa e yei klam da e u i yaroh ya ka seiñ wa em ko i mynsien neibynta wow kyntu kynrong ya ka niam khamtam hawa em cha jngai na yung deiwa pynkynmoo wa i akor salon toh iwa emkaam tam.
U Sanbor Shullai hawa e yei klam da e mynsien u ya ka seiñ wym hoi u kynran dien ki wei smat u wow e yarap la ha kiwon kiwon ki liang. Da pynrap u deiwa ong wa ka dwar yong oo wai ko ya ki la heiwon i won i kaam wa dawa ki.
Chooh chooh pynsñiaw u yei bakla kiwa boon wow ong wa nga toh u Jowai heithaw wow ong nga toh u Pnar hawa pyntipmit cha kiwi, da ong u ham bakla u ong nga u Jowai, toh u ong nga toh u Pnar iwa mut ya ka jaitbru neibhah ka Jowai toh ka chnong.
Da pynkut u yei klam deiwa e ya ka song poisa wa Rs. 50,000 cha u General Secretary ka seiñ.
Ha kani ka sngi da pynkup burom leh ya kiwa kitkaam warim ka seiñ nadooh u Deisar Langdoh (President warim), ka Iwadakermi Lyngdoh (Vice President warim), u Teinam Dkhar (General Secretary warim), u Kuneki Challam (Asst. Secretary warim) wa u Ridabiang Sungoh (Treasurer warim).
Da yoh leh ki chaad ki rwai na ka Seiñ Niamtre Khynnah Purae Shillong, Seiñraij Jowai, Seiñraij Niamtre Ummulong, Seiñtyllilang Niamtre Lathadlaboh, Seiñraij Wahajiar, Seiñraij Nartiang, Seiñ Ki Manbei Seiñraij Niamtre Shillong wa ki rwai na ki bru ka Silbi Passah wa ka Lasubon Dhar.
Hawa kut yong ka yalang da yoh yei kyntien khublei na ka khyllood Lamlynti Lamare (Vice President ka seiñ).
Discussion about this post