Ynne ka sngi ka Panaliar Niamtre Committee da pynman ko yei lehkmen yaka lyngkhooh dap 7 snem i lai luti ka Skur Hikai Niamtre ka Panaliar, Jowai lyngba ki chaad ki rwai wa kamjooh i klam kyntu kyrsu na ki waheh wasian.
Haka yalang tbian yong kani ka lehkmen wa da wan sakhi lang da ki waheh wasian naki dong waphær waphær ka Jowai wa kynthup ya u Dolloi ka Elaka Jowai, u Puramon Kynjing, da yoh i klam pdiang burom na u Lakhon Syngkon, Chairman Niamtre Committee Panaliar wa i ngooh Blai na u Marki Lakadong, Asst. Secretary Niamtre Committee Panaliar.
Da yoh leh i klam na u Waheh Chnong ka Panaliar, u Riquoma Rq Laloo, i klam naka symbood kongsan, ka Peki W Bareh wa na u kongsan yong kani ka lehkmen, u Sainia Kyndiah.
Neiliang u kongsan hawa klam da yaroh u ya ki bor pait bor pynlai kani ka Skur Hikai Niamtre, wa lyngba i em kam kani ka skur ki khon khynroo khyllood leh yoh ki u tip teiñ la pateiñ ya rukom niam wa da yoh pateiñ nadooh ki warim wajah.
Da pynkynmoo u leh yei kordor ka Bei wa ri sumaar ko ya ki khon, heijooh i por ki Committee waphær waphær leh toh u man ki kiwa tip ya ka Bei iwa mut ka chnong hi waroh kawi, dei wym hoi u pynlut phut ya ka poisa. Da kyntu u leh ya ki khynnah yow wan cha ka Skur Hikai Niamtre yow yoh yei sikai heiyatoh waka akor burom.
Ha kani ka sngi da yoh i chaad naki khynnah ki Skur Hikai Niamtre ka Panaliar, Chilliangraij, Seiñ Tyllilang Ladthadlaboh, Loomiongkjam wa kiwi.
Da pynkut ya ka yalang da ki klam e khublei na u Dauni Ram Kynjing, Secretary Niamtre Committee Panaliar.
Discussion about this post