Ka skur Tpep Pale Government L.P. School kawa da seiñ ha u snem 1974 da ka Dorbar Chnong Tpep Pale deiwa yarap kyrchaan lang u (L) Tylli Kyndiah, MLA ka Jowai Constituency ha kitu ki por deilang wa ki bru waheh wasian ka chnong Tpep Pale, ha uni u snem dapoi ko cha u moomer dap 50 snem i lai luti yong ka heiyatoh wow e i stat i tip.
Kamtæ neiliang ka skur ynnin ka 30 tarik da sdang ko yei lehkmen dap 50 snem wei da wan wow wai yei lehkmen da u Silvester Phanbuh, MCS, EAC, West Jaiñtia Hills District uwa da man leh kam u kongsan, hei emlang ka D. Lathong, Block Mission Coordinator, Laskeiñ Block, West Jaiñtia Hills District kam ka symbood kongsan chirup i sakhilang ki bru waheh wasian, kiwa yahkhmat ka chnong Tpep Pale, ki khynnah skur, kiwa sikai wa kiwi kiwi.
Ka phang yong kani ka lehkmen toh “Golden Past-Limitless Future” iwa mut ki 50 snem wada lai man ki kam ki ksiar wa kordor wei ka mynried wym em wa ye u khang yei ku i miat wa rap bha chooh chooh.
Katkam ka parom tbian yong ka skur wa da pynsñiaw da ka S. Pakma, Head Teacher da khana ko wa hei lai luti ka skur da yoh ko leh boon i yarap naka sorkar kam ka Midday Meal Scheme, i yarap pynyoh mynkna ki kot, ki Uniform neitæ ki School Grant, Teachers’ Grant wa kiwi kiwi.
Pyntip haroh ko wa dei kreh chitom kiwa sikai kamjooh da waroh kiwa embynta, kani ka skur da yoh ko leh yei naam kam ka PM SHRI School wei katni da tip yaka kam ka PM SHRI Tpep Pale Govt. L.P School Jowai.
Chooh chooh ka skur da chimbynta ko leh ha kiwa boon ki kaam wa pynman da ka sorkar la heiyatoh ki kynja pynsñiawthooh paidbah neitæ ki jait yalehke Sports, wei da jooh yoh rah naam ko leh haki jait yakob waphær waphær.
Ka symbood kongsan hawa klam da e nongmuna ko yaki skur waphær wa chem ko hei lai luti kam ka Block Mission Co-ordinator, wei yaroh ko leh yei kreh chitom ki bor pynlai kani ka skur khamtam wada yoh ko yei kyrdan PM SHRI School kawa man ka burom yong ka skur hi waroh kawi.
Kyntu haroh ko yaki bor pynlai, kiwa sikai wow nang kreh chitom chooh chooh neibhah da em bait ki hapoh ki paitsiar ka chnat puræ puthi.
Booh haroh ko i kyntu ya kiwa sikai wow man kiwa e kti hei kaam nadooh mynsien neibhah neipor cheipor ye u mih ki kyndon ki aiñ waphær heiyatoh i puræ puthi i wym ye u yait lait neiwa hap u pdiang hanla man iwa eh leh.
U kongsan won da ong u ka mynried yong ka skur Tpep Pale man ko leh ka bynta yong ka mynried ka jylla, neibhah lada ku ka skur, daw ku lang ka chnong, ka District waka jylla.
Kamtæ kyntu u ya kiwa sikai wow pait bniah leh yei sap ki khynnah khnang yow yoh ki yaka mynried wa miat wa bha. Wei kamwa 50 snem da lai luti kani ka skur yooluti u leh wa haki 50 snem chakhmat leh u man i kyrkhu.
Kiwi won wa e i klam ha kani ka sngi kynthup ki ya u D. Pohchen, Ex-Secretary SMC, naka dkhot SMC, ka Wan Toi, naka Dr. F. Rymbai kawa jooh puræ ha kani ka skur, naka B. Kyndiah, Chairperson Golden Jubilee Celebration, na u S. Langshiang, Secretary Golden Jubilee Celebration wa kiwi haka yalang wa pynlai da u R.S. Teron, Headmaster.
Da pynchongchit chooh chooh dei rwai na kiwa sikai, naki khynnah skur wa kiwi.
Discussion about this post