Ka Balang U Blei M&A Sohmynting, West Jaiñtia Hills District ynne ka sngi da ya ksohktilang ko waka pyrthai waroh kawi wow lehkmen yaka World Environment Day deiwa pynman dei thung dieñ ha i thaw ka balang wa tip kam ka Riatiengker hei sakhi lang u W.H. Gassah, District Librarian West Jaiñtia Hills District kam u kongsan, ka Rida Rngad, HDO Thadlaskeiñ C&RD Block kam ka symbood kongsan, u Chibait Langstang, Engineer NRMC yong ka CLLMP, kiwa yahkhmat yong ka chnong Sohmynting wa kiwi kiwi.
Ha ka yalang wa pynlai da u Rev. W.D. Suting, neiliang u Orlan Kya ong u ka thong yong kani ka sngi toh yow pynemburom yow Blai kamjooh yaka rym-aw khnang yow neh u sah ko wei rngam ki loom ki pdeiñ neibynta i myntoi wym du ya ka pateiñ katni tangwa wot ya kiwa hadien.
U D. Pyrtuh, symbood waheh chnong da kyntu kyrsu u ya ki paidbah wow e i kyrchaan yeiwa da booh u Blai haka rym-aw neibhah dap kdang i hadooh ynne ka sngi leh toh wa e u Blai ha i ki um ki wah, ki dieñ ki siej kamjooh ka thaw wow rep u riang i.
Neiliang u Chibait Langstang, Engineer NRMC da yaroh u ya ka chnong Sohmynting wa man ko kawi wada kreh chitom bha u pynkreh ya ki kaam ka Community Led Landscape Management Project wa haap hapoh ka Meghalaya Basin Development Authority heiyatoh i tei i chna, i thung dieñ wa kiwi ki bynta, deiwa kyntu leh u sumaar u pynneh pynsah ki yei yi wa ka yung krehkaam yong ki da e kti ko.
Heiyatoh wa ki dieñ da ong u wa lada pam uwi hap thung salan won 100 tylli.
Ka symbood kongsan, ka Rida Rngad HDO Thadlaskeiñ C&RD Block da ban joor ko hajrong i emkaam u pyndooh pyndam ya ki Plastic neibhah kani man ko ka daw wa khroo wa ktah yaka rym-aw neibhah wa neh ki khlem pyut da ki spah spah snem.
Yow ye u yarap ya ka rym-aw nyngkong hi ong ko toh u sdang na samen samen deiwa dam noh u pynemkaam ya ki Plastic wa pynemkaam du chisien nadooh ki Plastic thap tiar, ki khuri, ki pliang ja wa kiwi, neibhah najrong wa ktah ki ya ka rym-aw ktah ki leh yei chait i khiah.
U W.H. Gassah kam u kongsan ong u, “Emkaam u burom u yada ya ka rym-aw neibhah wot ha ka Bible leh katkam ka Genesis da thoh da klam ko chaphang ka rym-aw, heiwa u Blai da chna u ya ka pyrthai næ ka kpær Eden wei booh u ya u Adam waka Eve u pait u sumaar ki ka, da pynbiang u waroh i emkaam yong ki, wei kam ki bru u man kynrad haroh ki wow pait u sumaar ya ka rym-aw”.
Hajrong kani ka yurim ong u wa kam ki bru toh u sñiawthooh i wa u Blai da e u ka rym-aw wa kyrpang yow im u chong u sah ymtoh u pynjæd pynpra ya ka.
Hawa yaroh ya ka Balang U Blei wa man ko ka nongmuna wa bha ya kiwi, kyntu u leh wow pteiñ u leh burom ya ka bei rym-aw man-ka-sngi deiwa sumaar ya ki dieñ wa da dep thung, neibhah ha kini ki sngi da yoo yei kylla ka suiñbneiñ chawa palat wot haka jylla yong i ka thaw wa pyngngad leh da maad yei chit wa sñiawmaa.
Kamtæ ka laad u pynduna yei chit toh u thung chiboon ki dieñ deiwa pyrkhat ya ki pateiñ wow wan.
Hadien ka yalang, waroh da ya chimbynta ki hei wow thung ya ki dieñ wa da e sñiawbha da ka Sohmynting VNRMC kamwa 300 tre wei neiliang ki khon ka balang da pyrchang haroh ki ya ki laad yada deiwa kær ya kini ki dieñ.
