Ka Mawlai kawa chimbynta hei sien nyngkong ha ka Meghalaya State League daw yachem ko waka Khliehmawlieh Youth Club, katwa ka Rangdajied United kawa yoh wa ar ha u 2019 daw yachem ko wa kawa jop ha u 2019, ka Shillong Lajong ha ki Semifinal ka Meghalaya State League 2023, iwa da dep wow pynbait ynne i janmiet.
Ya ki Semi da yaleh deiwa bood yei rukom ka Home-and-Away nadooh ka 10 tarik uni u bnai heiwa ya ka Second Leg won u sdang nadooh ka 13 tarik. Ya ka Final won daw pynman ha ka First Ground, Polo ha Shillong ha ka 17 tarik uni hi u bnai.
Yei pynkhle nasib ya ki Semi da leh deiwa emlang kiwa yalehbol wa pawnaam ka Meghalaya kitæ u Redeem Tlang, u Aiban Dohling wa u Halen Nongtdu waka FIFA Assistant Referee, ka Ri-iohlang Dhar hapoh i pait u MSL Tournament Director, u Wanshanbor Kharkrang wa kiwa mihkhmat na waroh soo liang.
Na kini ki soo liang du ka Khliehmawlieh ka wym toh ka Club na Shillong kawa yoh u psiah Semifinal.
Ha iwi won i liang ki yalehke wa da pynman ynne ka sngi toh kawa khaddooh ha ka Group D wei kawi won ha ka Group C kawa dang em sa kawi ka yalehke, heiwa ka Chipakkore da jo ko da 9-2 ya ka Wa’sa FC ha Group D katwa ka Mawten da jop ko ya ka Lumdiengngan da 3-0 ha ka Group C.
Ki yalehke mynstep u em du kawi donhi kawa man leh kawa khaddooh chwa u sdang ka Semifinal kawa daw pynman hapyrdi ka Shillong Lajong waka Riangdo heipor 3:00 waje i sngi ha Mawkyrwat kawa man leh ka yalehke ka Group C.
