Ynne ka sngi ka Panaliar Tourism & Environmental Development Society (PTEDS) da lehwarom ko ya ka World Environment Day deiwa thung ya ki tre dieñ ha Park ka Riatkakiang, Panaliar, Jowai heiwa kawa jop ya ka Rubaru Miss India Elite 2023 ka Rupda RY Lato da man ko kam kawa chah khut sñiawbha.
Chwa wow pynman ya i thung dieñ da em ka yalang wa tbian kawa da pynlai da u waheh chnong ka Panaliar uwa man leh u President kani ka Society u Riquoma Rq Laloo heiwa da khana u wa ka PTEDS toh ka Society kawa pynlai da ka chnong weiwa ynne man ko ka sien wa nyngkong kawa da ye wow pynman ya i thung dieñ da ka PTEDS.
Chooh chooh da ong u wa ka la’ær wa ka um toh kiwa emkaam bha ya ki bru ha pyrthai wa kiwi kiwi wei kini waroh yoh ki toh na ki dieñ wei kiwa rim man kiwa chynna jngai heiwa da thung ki ya ki dieñ ki siej.
Da ong u leh wa emkaam i wow em i mynsien wow maya wei wow yada ya ka rym-aw talawiar soodong yong i.
Ka Rupda RY Lato hawa e yei klam da ong ko wow yada wei wow pynneh ya ka rymaw toh iwa emkaam bha neibhah kam ki bru katwa dang em i ha pyrthai daw emlang bait i wa ka rymaw.
Da ong ko leh wa waroh kiwa embynta ha kani ka sngi lehwarom ymtoh u kut i du ynne ka sngi donhi tangwa u pteiñ i kamwa man i ynne ka sngi wow burom ya ka rym-aw.
Ya ki kyntien e khublei da yoh na u Samhaoo Passah uwa man u Secretary ka PTEDS.
Ha kani ka sngi da emlang ki dkhot ka chnong kamjooh leh kiwa kitkaam ka Panaliar Women Welfare Organisation (PWWO).
