Ka seiñ Rashtriya Swamyam Sevak Sangh (RSS) kawi na ki seiñ hapoh ka ri India kawa yieñ wow kreh ha ka yurim wow yatylli, i maya wa i burom markylliang kam ki khon ka ri India wot hapyrdi i yaphær wa boon la hei ngait niam, ki riti dustur wa kiwi kiwi.
Kam chibynta wow pynemwarim ya i lai luti yong ka seiñ iwa la 96 snem hapoh ka ri India ya kawa da sdang nadooh u snem 1925 da u Dr. Kishav Baliram Hedgewar, ki heh ka seiñ ha Ri-loom Jaiñtia ynnin ka 16 tarik dei sñiawkhia da chim ki wow pynman ya i yachemlang ha Yungwalieh ka Dorbar Chnong Chiliangraij.
Ka Vijayadashami man ko ka sngi kawa khroo ya kiwa ngait niam Hindu heiwa u Ram da jop u ya u Rabon (Ravana) uwa da rahbor ya ka Sita kawa man ka kurim u Ram wei ya ka RSS leh da sdang da seiñ ha kani ka jooh ka sngi ha ka 27-09-1925 kawa haap ha kani ka sngi Vijayadashami ha utai u snem (1925).
Ya ini i yachemlang da wan sakhi da u Dolloi ka Elaka Jowai, u Puramon Kynjin, u Khroolamsalanki Pariat, President Seiñ Khooid Ya Ka Wah Myntdu, u Oriland Shylla, General Secretary, Dorbar Chnong Chilliangraij wa kiwi kiwi kiwa da chah khut sñiawbha.
Ya ka Vijayadashami wa ka RSS Day da pynman chirup wei ngooh i dem wei da pynkhroo ya kani ka sngi deiwa booh ya ki tiar yaleh kam ki wait wa ki khnam kiwa man chibynta yong ki tiar yaleh ki bru yongrim.
