U Montri wa pait ya ki kaam uiñke suwari ka jylla uwa man leh kam uwa e ktien ka sorkar Meghalaya Democratic Alliance (MDA-II), u Paul Lyngdoh da ong u wa em i pynsñiaw kawa man jar jiar hawa yatoh wa i thmu wanrah ya ka luti rel ha East Jaiñtia Hills, wei ka sorkar daw bichaar joor ko yeini.
Hadien wa u MLA ka Khliehriat uwa man leh u Montri sorkar, u Kyrmen Shylla ha ka sngi wa ar da ong u wa ki paidbah ha Jaiñtia Hills toh u yohlaad ki deiwa laitlooid wow chim rai hajrong i wan ka luti rel khlem da luchia kiwa na baar, da mih i pyrchah wa joor na ki seiñbhalang ha ka sngi wa bood.
Hajrong kani ka phang, u Montri Rangbah ka jylla, u Conrad K Sangma da ong u wa lada em i kyrchaan na ki paidbah ka East Jaiñtia Hills, ka sorkar ye ko wow lai chakhmat heiyatoh wa kani ka kreh ha katai ka thaaiñ.
Hawa yaklam won wa u Paul Lyngdoh ynne ka sngi, da ong u wa hawa yatoh wa ka luti rel da em i pynsñiaw wa em kiwa kyrchaan wei em leh kiwa pyrchah.
Da ong u leh wa ka sur phær ko wei kawa khleh nadooh kiwa chna aiñ, ki seiñbhalang wa kiwi kiwa da embyntalang, wei toh i kaamram yong ka sorkar wow bichaar wei wow chim ka luti wow bichaar deiwa pliah yow chim ya ka rai katkam i kwah yong ki paidbah.
Chooh chooh da ong u wa emkaam wow pynman Public Hearing yow sñiawthooh yeiwa kwah ki paidbah wei wow pait iyi wa myntoi wei kammon leh wow yada ya kiwa chong chnong.
Heijooh i por da ong wa ka chnat Tourism ym pu em leh ko iwon iwon yow puræ bniah lada ka luti rel daw yarap ko wow pynku ya ki kaam uiñke suwari.
“Hei yong sakhiat na jooh klam O wa heiyatoh wa ki kaam uiñke suwari ha Meghalaya daw ku ki lada ki thaw ki bhaw em ki ya ki sarok wa biang”, da ong u Paul.
Discussion about this post