Ka Narpuh Border Area Joint Action Committee (NBAJAC) ka synjuk yong ki Waheh Chnong, Secretary Chnong kiwa em hapoh ka Elaka Narpuh wa ki chnong kiwa em markhap wa ka thaaiñ Narpuh da dawa ki na ka sorkar Meghalaya Democratic Alliance (MDA) wow e Community & Rural Development Block thymme ya ka thaaiñ Narpuh khnang wa ki chnong kiwa em chajan khappood Bangladesh wa khappood Assam u suk ki hawa lai emkaam cha ki yung krehkaam yong ka Block.
Kamwa man ynne ka sngi da pynkyrriah wei da wai mooyurim ya ka C&RD Block Khliehriat cha Wapung da u Conrad Sangma, wei ini i daw booh ko yei eh ya ki paidbah waroh yong ka thaaiñ Narpuh kattu neibhah wa awjan waroh ki Scheme yong ka sorkar khamtam ki yong ka MGNREGA hap lai lyngba ka Block yow yoh ya ki wei ini daw booh yei eh wei pynchitom ya ki chnong kam ka chnong Malidor, Ratacherra, Dona Umbluh, Huroi, Hingaria wa kamtæ ter ter.
I jngai katni da man hadooh 90 Km du wow lai cha ka yung krehkaam ka Block kamtæ ka NBAJAC da kyrpaad joor ko ya ka sorkar MDA wow e da ka Block thymme ha thaaiñ Narpuh deiwa booh ya ka Headquarter ha Lumshnong khnang wow pynsuk ya ki paidbah neibhah kani ka thaaiñ da man ko kawa da chah iehbeiñ.
Ka NBAJAC da maham ko deiwa eh wa lada ka sorkar MDA ym ye ko wow e C&RD Block thymme, ka Narpuh daw Boycott ko chi syndon ya ka Election 2023 deiwa e por leh wow e chwa ka dorbar mang tyngka namo ka Budget Session u 2022, lym kamtæ ka NBAJAC daw pynman ko da ki yakhih kiwa joor.
Ka kyrwoh na u Secretary ka NBAJAC, u Daiapherbha Lamare.
Puræ leh: Dawa ka Narpuh Border Area Joint Committee wow pynneh ya ka C&RD Block ha Lumshnong
