I khut khang chnong wa 36 kynta da ka Dorbar Chnong Tympang Iawmusiang Jowai kawa da sdang ynne i step 6 waje da man ko kawa lai bait lai ryntih neiwa yoh u sakhi yei lyngam ki yaaw ki haat ki luti syngkieñ, ki thaw puræ, ki yung krehkaam sorkar wa kiwi.
Boon naki skur ha Jowai leh man ki kiwa lyngam neidaw wa duna i poi ki khynnah, kiwa sikai najrong wym em kari kamai, heiwa kitu kiwa dapoi cha skur leh da hap liwan noh ki. Wot ki yung krehkaam sorkar leh duna kiwa wan kreh ynne neidaw wym em kari kamai.
Ya kani ka khang chnong da kyrchaan lang daki dorbar chnong waphær waphær ka Jowai, heiyatoh wa i eh wa da maad ki khon ka Jowai neidaw wym yoh thaw noh jhep hadooh ynne ka sngi.
Haki bynta u pood u ang ka Iawmusiang da sakhi waki Volunteer kynthai wa chynrang da yang ki yow khanglaad yaki kari u lai u wan kamwa dadep pynbna chwa deiwa chah du yaki Emergency Service donhi, najrong wa e laad u wai du ki dukan Pharmacy waki Bank.
Yaki bru wa lai wa wan leh da kylli takit wei da paan i yakrehlang yong ki heiyatoh wa ini i khang chnong.
Ha Ladthadlaboh leh neiliang ki Volunteer da ya yang ki ha Newhill ha laad Iawthymme wa ha laad Kiang Nangbah Government College heiwa da em ki kattu katni ki kari kamai wa mut u psiah cha Jowai leh da chah ksoh ki heini ha laad College.
Hei yaklam wa u waheh chnong ka Iawmusiang, u Ajoy Lywait da pyntip u wa i pynkrehkaam ya kani ka khang chnong man ko kawa jai jai, hanla em hi ki bru wa pyrchang u pynyoo bor.
Heiyatoh waki khynnah skur ki wakreh sorkar wa hap lai na Iawmusiang, da ong u wa da pyrchang hi ki wow pynsñiawthooh katwa ye katwa ya kitu wa pyrchah won leh ym em pynbor yaki.
U waheh chnong pyntip haroh u wa neiliang ki manbei, ki khynnah khynroo ha kani ka sngi da yaleh haroh ki u pynkhooid yei jhep wa lang hapoh ka chnong, najrong wa em leh ki bru Muster Roll wa wan pynkhooid kam i bynta yong ki ha kani ka sngi.
Da kyntu chooh chooh u yaki paidbah wa kamwa da yaksohkti lang ki ynne ka sngi sdang step, mynstep leh i jooh hi, khnang yow man iwa jai jai.
