Jowai: Ka yungkrehkaam ka Krishi Vigyan Kendra Jaiñtia Hills, Jowai da pynman ko ya ka yalang wa kyrpang wa tip kam ka “Live Telecast yong ka National Conference” kawa pynman ha New Delhi ha ka 16 waka 17 tarik uni u bnai heiwa u D. Lamar uwa man kam u Assistant Director yong ka Agriculture, West Jaiñtia Hills da man u kam u kongsan ha kani ka sngi hei emlang u D. Passah uwa man kam u Deputy Ranger Forest (JHADC).
Ha kani ka sngi da yoh laad wow pynyoo yei klam u Montri Rangbahdooh ka ri u Narendra Modi kamjooh leh ya ka Live Telecast yong ka Krishi Unnati Mela kawa da pynman ha ka jooh ka por.
Ha kani ka Live Telecast u Montri Rangbahdooh ka ri da ong wa kani man ko ka rynsan kawa biang dooh wow yachem wa ki warep wa ki stat Scientist wow e ki ya ka sikai chaphang ki laad rukom rep wa thymme.
U Modi da kyntu u ya ki warep wa yoh ya ki khusnaam wow krehchitom ki ha ka kaam rep kaam riang. Da batai u leh wa i thmu yong ka sorkar wow pynku archah ya ka nong ki warep hadooh u snem 2022.
U kongsan da klam u chaphang ki laad wow pynku ya ka yoh ka kot ki warep wei da em leh ka ya phyllu yumut wa ki Farmers Scientist yong ka yungkrehkaam ka KVK wa ki warep.
Ya kani ka yalang da pyllai da ka R. Lyngdoh SMS (Agronomy), wei ya ki ktien lamphang da e ka Banylla Kharbamon SMS ( Horticulture) .
Wei da yoh leh ya ki ktien e khublei na u D. lyngdoh HDO, Thadlaskein Jowai.
Discussion about this post