Shillong: U MLA ka BJP na South Shillong, u Sanbor Shullai da kyntu u ya u montri ka chnat yada ri, u Rajnath Singh ha nongbah Delhi wa ya ka madan Garrison ha Laban, wa toh u e wow pynemkaam wei wow pynlai noh da ki paidbah.
Ha i yachem wa u Rajnath ha nongbah New Delhi, u Sanbor ryngkat wa u President ka BJP Meghalaya, u Ernest Mawrie da paan ki na u Rajnath ya kani ka madan deiwa yasoi ya ka Memorandum of Understanding (MoU) wa ki bor chipai, kiwa pynlai ya kani ka madan.
U Sanbor da pynsñiaw u ha u Rajnath wa nachwa leh da em i pyrchang wow ekti ya ka ha ki paidbah wow pynemkaam tangwa ym em u man kaam i.
U Sanbor da ong u wa ka sorkar jylla ye ko u rah ya kani ka kaam ha ka sorkar pyrdi wow soi da ka MoU wa ki bor chipai wei ye leh u pynemkaam lang ya kani ka madan da ki chipai wa ki paidbah deiwa ong wa ki chipai ym wit ki yeini neibhah wa em ko hapyrdi sor wei ym em u pynemkaam ya ka.
“Ini daw pynmyntoi bha i chiboon ya ki paidbah wa ya ki chipai,” da ong u Sanbor.
Ha ini i yachem u Sanbor da kyntu u leh ya u Rajnath wow pynyaar ya i krehkaam ka aiñ chna yung ka Shillong Municipal Board cha ki thaw wa haap ha ka Cantonment Area.
Da kyrpaad u leh wow pynsmat ya i mang poisa ya ki top saam um ka PHE wei wow pynku kyrdan ya ka skur ha Cantonment cha ka Class 12 wei wow pynbha ya ka Goenka Hospital deiwa pynboon ya ki thawthiah cha 20 tylli.
Da kyntu u leh wow chah ya ka Shillong Cantonment Board wow chna ya ki dukan heh namo ki Shopping Mall wa ki thaw pynyieñ kari neibhah wa em chiboon ki thaw kiwa khlem pynemkaam ha ki thaw wa man yaw ha Shillong.
Discussion about this post