Hadien wa uwi uwa chong chnong ka Sohmynting, West Jaiñtia Hills District da lai thooh yutip u lyngba ka RTI naka yung krehkaam ka chnat Public Health Engineering RWS Division, West Jaiñtia Hills, Jowai hajrong i pynkreh yaka Scheme chna paikhana da kani ka yung krehkaam lyngba ka Scheme Swachh Bharat Mission, chem u wa hadooh da ki phaw lak tyngka da em i baam tooh na kani ka Scheme neibhah wa u paidbah ym em yoh myntoi u katkam ka hok wa da mang kyrpang na katai ka laad yarap paidbah ka sorkar.
U Dapoi Pyrtuh kam uwa yaleh RTI da khana u wa katkam ka RTI ka mang tyngka yong katai ka Scheme neibynta u pynyoh paikhana cha ki paidbah ka chnong Sohmynting toh T. 12,000 neibynta kawi kawi ka manyung wei kamwa 381 tylli ki manyung toh u yoh myntoi ki.
Da ong wa ya kani ka Scheme da pait wei pynkreh da u Mynjurlang Lyngdoh uwa man u Chairman ka Village Water and Sanitation Committee, wei neiliang ka PHE da pynlait lut ko waroh katai ka poisa neibynta i hok u paidbah tangwa ym em e (Supply) ya kiwon kiwon ki tiar.
“Tangwa lyngba ka RTI won chem wa da thok da chukor u ya i ki paidbah wa chong chnong kiwa duna i stat i tip, neibhah wa na katai ka poisa T. 12,000 waka chnat sorkar da pynlait ko neibynta i myntoi u paidbah yow yoh ki yaka paikhana kawa rap biang, iwa man leh chibynta i lai luti cha ka thong yong ka sorkar yow pynku yei rukom im yong i ki paidbah nongkyndong, tangwa na katai ka T. 12,000, em ki yung wa e u T. 6000 deilang wa iwi ar ki tiar, em kiwa e duna u na ka T. 6000, neitæ em kiwa yoh du ka poisa khlem ki tiar, em kiwa yoh du ki tiar khlem ka poisa, wei em won leh ki wym yoh iyi iyi napyrdi kini ki 381 yung, iwa da wanrah ya chiboon ki kynrum kynram wei i wym che u paidbah,” ong u Dapoi Pyrtuh.
Da pynsñiaw haroh u wa khlem da chim yukheiñ bniah nei chah bam tooh kawi pa kawi ka yung wa yoh myntoi leh, i baamsaap wa da che kdar bha lyngba ka RTI da poi ko da ki phaw lak tyngka, neibhah napyrdi ki tiar chna paikhana wa kynthup kam ki Indian Pan, Zyphone, Footrest, Pipe 6×4, Pipe 6×3, Bend, Tee, Reducer Socket, Covel, Dusbin, Rot, Cement wa ki G.I. Sheet da thoh u cha ka PHE wa da dep pynyoh lut u ya kini ki tiar cha waroh ki paidbah tangwa katkam i yongsakhiat em ki bru wa yoh em won ki wym em u yoh ya kini ki tiar.
Nalor kini ki tiar i chah baam tooh wada tikna bha iwa da poi da ki phaw lak toh na u mooria, u chyiap loom, chyiap um, ki mooblok heiwa da thok u yaka yung krehkaam wa da e lut u cha ki paidbah.
Katkam ka Report wa da phah u cha katai ka yung krehkaam, da kam u wa i lut neibynta i Supply chyiap um chaki paidbah da khynjoh T. 2,25,000, u chyiap loom T. 42,000, u mooria T. 1,87,000, neibynta i Supply mooblok won T. 5,71,500 tangwa ya kini ki soo jait ym em u e u.
Da chem wot yei pyrtuid kiwa yoh myntoi leh da pna soi hi u, neibhah em napyrdi kiwa chong chnong kiwa em pyrtuid haka thup kam kiwa yoh myntoi wym em u yoh ki iyi iyi lada toh daka poisa næ ki tiar ki tar kamjooh.
Chooh chooh da chem haka RTI wa ki jooh ki bru leh mih pyrtuid ki arsien, neitæ da chem wa wot u bru u wym em yung leh ka paikhana won yoh hi u kamwa mih haka List kiwa yoh myntoi.
U Dapoi da pynrap haroh u deiwa ong, “Ha kitai ki snem hanla nga man hi O u dkhot yong katai ka Committee leh, kam u Chairman wym jooh em pynche u iyi iyi leh heiyatoh wa katai ka Scheme, toh hadien donhi wa nga da yoh ujor O na ki paidbah, sdang O u thooh yei sakhiat lyngba ka RTI”.
“Da chem leh wot ya i Signature yong ki kattu katni ki dkhot leh da soi thok u kamwa mih haka RTI wa kynthup leh yei Signature yong nga”.
“Nga kam uwi na kiwa chong chnong yong ka chnong Sohmynting katwon dap o dei sñiawsih wei sñiawkhia wow chem wa em kam kini kiwa yahkhmat chnong heiwa ki paidbah waroh chi kattu e ki yei chaniah lyngba i dur angel yong oo, tangwa hanpaya man u kam u kriñ wa baam lut yong ka chnong”.
“Lada heini rukom cheiwon ka mynried yong i roi i paar ka chnong ka thaw u poi ko,” pynkut u Dapoi Pyrtuh.
(Feature Image-Representational Only)
